މާފަންނު ހުޅަނގު ދާއިރާގެ ކައުންސިލް މެންބަރުގެ މަގާމަށް އަމިއްލަ ގޮތުން ވާދަކުރާ އެ ދާއިރާގެ މިހާރުގެ ކައުންސިލް މެމްބަރު އިބްރާހީމް އަބޫބަކުރު ޕީއެންސީގެ ކެންޑިޑޭޓަށް ތާއީދު ކުރައްވަން ނިންމަވައިފިއެވެ.
މާފަންނު ހުޅަނގު ދާއިރާގެ މެންބަރުކަމަށް އިބްރާހިމް އަބޫބަކުރު އިންތިހާބުވީ ޕީޕީއެމް ޓިކެޓުގައެވެ. އޭނާ ވަނީ 2024 ވަނަ އަހަރު ޕީއެންއެފްއާ ގުޅިވަޑައިގެންފައެވެ. މިފަހަރު ކައުންސިލަށް އިބްރާހިމް އަބޫބަކުރު ވާދަކުރައްވަނީ އަމިއްލަ ގޮތުންނެވެ.
ނަމަވެސް އިބްރާހިމް އަބޫބަކުރު މިހާރު ވަނީ އެ ދާއިރާއަށް ޕީއެންސީގެ ޓިކެޓްގައި ވާދަކުރައްވާ އަދި މާލޭ ސިޓީގެ މިހާރުގެ ޑެޕިއުޓީ މޭޔަރު މުހައްމަދު އަރީޝްއަށް ތާއީދުކުރަން ނިންމަވައި އެކަން ހާމަކުރައްވައިފައެވެ.
ރައީސް ޑރ. މުހައްމަދު މުއިއްޒު، އަރީޝްގެ ކެމްޕެއިންގެ ދޮރުން ދޮރަށް ހަރަކާތުގައި ބައިވެރިވެ ވަޑައިގަތުމުން އެތަނަށް ވަޑައިގެން، އިބްރާހީމް ވިދާޅުވީ އަމިއްލަގޮތުން ކުރިމަތިލީ ފޯމު ހުށަހެޅުމުގައި ދިމާވި ކޮމިއުނިކޭޝަން އެރޯއެއްގެ ސަބަބުން ކަމަށެވެ.
“އެހެން ނޫންނަމަ ޕާޓީއަށް މިވަރުގެ ޑެމޭޖެއް އަސްލު ލިބޭކަށް އަޅުގަނޑެއް ނޭދެން. އަޅުގަނޑަކަށް ވެސް ނޭނގޭ އޭތީގައި ކަންތައްތައް ވެގެން ދިޔަ ގޮތެއް. ރައީސަށް ވެސް އެނގިވަޑައިގެން އެކަން އޮތީ،” އިބްރާހިމް ވިދާޅުވިއެވެ.
އެހެންވެ އަރީޝްއަށް ތާއީދުކުރަން ނިންމަވާފައިވާކަމަށް އިބްރާހިމް އަބޫބަކުރު ވިދާޅުވިއެވެ. ދާއިރާގެ ރައްޔިތުން އަރީޝްއަށް ވޯޓު ދިނުމަށް އެދިވަޑައިގަންނަވާކަމަށް އިބްރާހިމް އަބޫބަކުރު ވިދާޅުވިއެވެ.
ކިޔުންތެރިންގެ ހިޔާލު