ބޭންކް އޮފް މޯލްޑިވްސް (ބީއެމްއެލް)ގެ އިންޓަނޭޝަނަލް ވޮލެޓް “ސްޕައިޕް” އައްޑޫ ސިޓީއަށް ތައާރަފުކޮށްފިއެވެ.
ބީއެމްއެލުން މިދިޔަ އަހަރުގެ އޮކްޓޫބަރު މަހުގެ 29 ވަނަ ދުވަހު ބާސެލޯ ނަސަންދުރާގައި ބޭއްވި ރަސްމިއްޔާތެއްގައި އިންޓަނޭޝަނަލް ވޮލެޓް “ސްވައިޕް” ތައާރަފުކޮށްދެއްވީ ރައީސް ޑރ. މުހައްމަދު މުއިއްޒެވެ.
ބީއެމްއެލުން އައްޑޫގައި މިރޭ ބޭއްވި ރަސްމިއްޔާތެއްގައި ސުވައިޕް އައްޑޫއަށް ތައާރަފުކޮށްދެއްވީ ހޯމްލޭންޑް މިނިސްޓަރު އަލީ އިހުސާނެވެ.
ބީއެމްއެލުން ބުނެފައިވަނީ އެ ވޮލެޓަކީ ޒުވާނުންނާއި ވިޔަފާރިތަކަށް ފަސޭހަކަމާއެކު، ކްރޮސްބޯޑާ ޓްރާންސެކްޝަންތައް ހިންގުމަށް ބޭނުން ކުރެވޭނެ ވޮލެޓެއް ކަމަށެވެ. އެ ވޮލެޓުގެ ސަބަބުން ހަރަދު ކުޑަކޮށް، ބޭރު ފައިސާ ރާއްޖެއަށް ގެނައުމަށް އެހީތެރިވެދީ އަދި ބޭރު ފައިސާ ހޯދުމަށް ހުރި ދަތިތައްވެސް ކުޑަވެގެންދާނެ ކަމަށް ބީއެމްއެލުން ބުނެފައިވެއެވެ.
ދުނިޔޭގެ ކޮންމެ ގައުމެއްގައި ހުރެގެންވެސް އިންޓަނޭޝަނަލް ވޮލެޓް “ސްޕައިޕް” ބޭނުން ކުރެވޭނެ ކަމަށް ބީއެމްއެލުން ބުނެފައިވެއެވެ. އެއްވެސް ފީއަކާ ނުލައި ކޮންމެ ގައުމަކުންވެސް ވަގުތުން ފައިސާ ލިބޭނެކަމަށް ބީއެމްއެލުން ބުނެފައިވެއެވެ.
“ސްވައިޕް” އަކީ 100 ޕަސަންޓު ދިވެހި އުފެއްދުމެއް ކަމަށާއި އެއީ ދުނިޔޭގެ މަޝްހޫރު ޕޭމަންޓް ވޮލެޓްތަކާ އެއް ފެންވަރުގެ އުފެއްދުމެއްކަމަށް ބީއެމްއެލުން ބުނެފައިވެއެވެ.
ކިޔުންތެރިންގެ ހިޔާލު