ދެމަފިރިންގެ ބޯހިޔާވަހިކަމެއް އޮތް ނަމަވެސް ގޯއްޗަށް އެދި ހުށަހެޅޭ ގޮތަށް ހިންގާ “ގޯތިގެދޮރު” ޕްރޮގްރާމުގެ ދަށުން ގޯއްޗަށް އެދި ފޯމު ހުށަހެޅުމަށް ހުޅުވާލައިފި އެވެ.
ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތް ނަމަވެސް، ގޯއްޗަކަށް ކުރިމަތިލުމުގެ ފުރުސަތު ދޭން ބޯހިޔާވަހިކަމުގެ އައު ޕްރޮގްރާމެއް އިއުލާނުކުރީ މި މަހުގެ ހަތަރު ވަނަ ދުވަހު އެެވެ.
ގެދޮރުވެރިކަމާ ބެހޭ ވުޒާރާއިން ބުނީ މި ސްކީމްގެ ދަށުން ގޯއްޗަށް ހުށަހެޅުމުގެ ފުރުސަތު މިއަދު ހެނދުނު 11:00 އިން ފެށިގެން އަންނަ އޭޕްރީލު މަހުގެ ނިޔަލަށް ހުޅުވާލެވިފައިވާކަމަށެވެ.
މި އުސޫލުގެ ދަށުން ބޯހިޔާވަހިކަމަށް އެދި އެޕްލިކޭޝަން ހުށަހަޅާނީ ބޯހިހާވަހިކަން ޕޯޓަލް މެދުވެރިކޮށެވެ.
މި އުސޫލުގެ ދަށުން ދޫކުރަން ހަމަޖެހިފައިވަނީ ރަސްމާލެއިން، 1،250 އަކަފޫޓުގެ ގޯތިތަކެވެ.
މިސްކީމްގައި ހިމެނޭ ދެ ކެޓަގަރީއަކީ މާލެ ރަށްވެހިންނަށް ޚާއްސަ ކެޓަގަރީއާއި މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ޚާއްސަ ކެޓަގަރީތަކެވެ.
މިކަމާ ގުޅޭ އުސޫލާއި، ހުށައަޅަންޖެހޭ ލިޔެކިޔުންތަކުގެ ތަފްސީލާއި ޕޮއިންޓްދިނުމުގައި ބަލާނެ ކަންކަމުގެ ތަފްސީލްތައް ގެޒެޓުގައި މިހާރު ވަނީ އާއްމުކޮށްފައެވެ.
ކިޔުންތެރިންގެ ހިޔާލު