ދިވެހި ރައްޔިތުންނާއި ޤައުމަށް ގެއްލުންވާނެ ކަމެއްގައި އެރައްޔިތުންގެ ގާތުގައި ނާހާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ރިޔާސީ އިންތިޚާބާއި ރައްޔިތުންގެ މަޖިލީސް އިންތިޚާބު އެއް ދުވަހެއްގައި ބޭއްވުމާމެދު ޤާނޫނު އަސާސީއަށް ގެނެސްފައިވާ އިސްލާޙާމެދު ރައްޔިތުންގެ ވިސްނުން ހުރި ގޮތެއް ބެލުމަށް ނެގުމަށް ހަމަޖެހިފައިވާ ވޯޓާއި ގުޅިގެންނެވެ.

ޤާނޫނު އަސާސީއަށް ގެނެސްފައިވާ އެ އިސްލާޙު ރައީސް ތަސްދީޤު ކުރައްވާނީ ރައްޔިތުން އެގޮތަށް ނިންމައިފި ނަމަ އެވެ. އެހެން ކަމުން އަންނަ މަހުގެ ހަތަރުވަނަ ދުވަހު އެ ވޯޓް ނަގާނެ އެވެ.

ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ރައްޔިތުންނަށް މަންފާއެއް އޮތް ކަމެއް ކަމަށް އެމަނިކުފާނަށް ފެނިވަޑައިނުގަންނަވާ އެއްވެސް ކަމެއްގައި ރައްޔިތުންގެ ގާތަށް ނުދާނެ ކަމަށެވެ. ދެ އިންތިޚާބު އެއް ދުވަހެއްގައި ބޭއްވުމަށް އެމަނިކުފާނު ތާޢީދު ކުރައްވަނީ އެކަމުގެ ގިނަ ފައިދާތަކެއް ހުރުމުން ކަމަށާ ރިޔާސީ އިންތިޚާބު ބާއްވާތާ އެންމެ ހަ މަސް ފަހުން މަޖިލީސް އިންތިޚާބު ބޭއްވުމުން އެކަމުގައި ޤައުމާއި ރައްޔިތުންނަށް އޮތީ ގެއްލުން ކަމުގައި ރައީސް ވިދާޅުވި އެވެ.

ދެ އިންތިޚާބު އެއް ދުވަހެއްގައި ބޭއްވުމުން ވޯޓްލާން ނިކުންނަ މީހުން އިތުުރުވެ އިންތިޚާބު މަޤާމުތަކަށް ވަޑައިގަންނަވާ ބޭފުޅުންނަކީ ރައްޔިތުންގެ ބޮޑު ތާޢީދަކާއެކު ވަޑައިގަންނަވާ ބޭފުޅުންނަށް ވާނެ ކަމުގައި ރައީސް ވިދާޅުވި އެވެ. އަދި އެމަނިކުފާނުގެ ސަރުކާރަށް ފުރަތަމަކޮޅު ދިމާވި ފަދަ ކަންކަން ކުރުމަށް އެއްވެސް ބަޔަކަށް ފުރުސަތު ނުލިބޭނެ ކަމުގައި ވިދާޅުވި އެވެ.

ރައީސް ވިދާޅުވީ ރިޔާސީ އިންތިޚާބުގައި ރައްޔިތުން ގޮތް ނިންމުމުން މަޖިލީހުގައި އޮތް ބާރެއް ބޭނުންކޮށްގެް އެ ނިންމުމަށް ގޮންޖަހަން މަސައްކަތް ކުރުމަކީ ބަލައިގަނެވޭނެ ކަމެއް ނޫން ކަމަށެވެ. އެއީ ޑިމޮކްރެސީގެ ހަމައެއް ވެސް ނޫން ކަމުގައި ވިދާޅުވި އެވެ. ނަމަވެސް އެމްޑީޕީން މި ފަހަރުވެސް މަސައްކަތް ކުރީ އެ އުސޫލުން ކަމުގައި ވިދާޅުވި އެވެ.

އެމަނިކުފާނު ވިދާޅުވީ ދެ އިންތިޚާބު އެއްކޮށްލަނީ ކަމަށާ އެއީ ރައްޔިތުންނަށް ގެއްލުންވާނެ ގޮތަށް ކުރާ ކަމެއް ކަމަށް ބުނެ އެމްޑީޕީން ހަޤީޤަތް އޮޅުވާލަމުންދާ ކަމަށެވެ. ރިޔާސީ އިންތިޚާބާއި ރައްޔިތުންގެ މަޖިލީހަކީ މުޅީން ތަފާތު ދެ އިންތިޚާބު ކަމަށާ އެ ދެ އިންތިޚާބު އެއް ނުކުރެވޭނެ ކަމަށް ވިދާޅުވި އެވެ. އަދި އެކަންކަން އެނގިތިބެ އެމްޑީޕީން ގަސްތުގައި ރައްޔިތުންނަށް އޮޅުވާލަމުންދާ ކަމަށް ވިދާޅުވި އެވެ.