ދިވެހިރާއްޖެއަށް އެތެރެކުރަން އުޅުނު ގިނަ އަދަދެއްގެ ސިނގިރޭޓްތަކެއް މޯލްޑިވްސް ކަސްޓަމްސް ސާވިސް އިން އަތުލައިގަނެފިއެވެ.

ކަސްޓަމްސްއިން ބުނީ، އަތުލައިގަނެފައިވަނީ، ކަނޑުމަގުން ރާއްޖެ އެތެރެކުރަން އުޅުނު ސިނގިރެޓް ތަކެއްކަމަށެވެ. ވަގަށް އެތެރެކުރަން އުޅުނު މި ސިނގިރޭޓްތަކުގެ އަދަދު 99،000 އަރާކަމަށް ކަސްޓަމްސްއިން ބުންޏެވެ. މިތަކެތި އަތުލައިގަނެފައިވަނީ މިމަހުގެ 5 ވަނަ ދުވަހު މާލޭ ވިޔަފާރި ބަނދަރުންނެވެ.

މީގެ ކުރިންވެސް ރާއްޖެއަށް އެކި ފަހަރުމަތިން އެތެރެކުރަން އުޅުނު ސިނގިރޭޓްތަކެއް ވަނީ އަތުލައިގަނެފައެވެ. މިގޮތުން އައްޑޫ ސިޓީ ހިތަދޫ ޕޯޓުން ހިފެހެއްޓި 1.8 މިލިއަން ސިނގިރޭޓް މިދިޔަ ޑިސެމްބަރުމަހުގެ ތެރޭގައި ވަނީ ނައްތާލާފައެވެ.

ރާއްޖެއަށް ދުންފަތުގެ ބާވަތްތައް އެތެރެކުރުން ވަނީ ހަރުކަށި ކޮށްފަ އެވެ. ގަވާއިދާ ހިލާފަށް ރާއްޖެ އެތެރެކުރާ އެފަދަ ބާވަތްތައް ހިފަައްޓާ ކަސްޓަމްސް އިން ދަނީ ނައްތާލަމުންނެވެ.