އަލްއަބްރާރް ހައްޖު އެންޑް އުމްރާ ގްރޫޕުން މީހުން އުމްރާއަށް ގެންދިއުމާބެހޭ ހުއްދަ ވަގުތީ ގޮތުން ހިފަހައްްޓައިފި އެވެ.

އުމްރާއަށް މީހުން ގެންދިއުމުގެ ހުއްދައިގެ ދަށުން އަލްއަބްރާރް ހައްޖު އެންޑް އުމްރާ ގްރޫޕް މިމަހުގެ 3 އިން މިމަހުގެ 26 އަށް ރަމަޟާން އުމްރާ ކުރުމަށް ހަމަޖައްސާފައިވާ އުމްރާ ދަތުރަށް ސައުދީއަށް ފުރުމަށް އެންމެ ފަހުގެ ތައްޔާރީތައް ވަމުންދަނިކޮށް އެ ދަތުރު ކެންސަލް ކޮށްފައިވާ ކަމުގެ ޝަކުވާ އިސްލާމިކް މިނިސްޓްރީއަށް ލިބުމާ ގުޅިގެން، އެ މައްސަލާގައި އިސްލާމިކް މިނިސްޓްރީން ކަމާ ގުޅުންހުރި މައުލޫމާތުތައް ސާފުކޮށްފައިވާ ކަމަށް އެ މިނިސްޓްރީން ބުނެއެވެ.

މިހާތަަނަށް އިސްލާމިކް މިނިސްޓްރީއަށް ލިބިފައި ހުރި މައުލޫމާތުތަކަށް ބަލާއިރު، އަލްއަބްރާރް ހައްޖު އެންޑް އުމްރާ ގްރޫޕުން ކަނޑައަޅާފައިވާ ތާރީހަށް އުމްރާއަށް މީހުންގެންދިއުމާބެހޭ އުސޫލާ ހިލާފުވެފައިވާ ކަމަށް އެ މިނިސްޓްރީން ބުނެއެވެ.

“މިކަމަށްޓަކައި، މި ކުންފުންޏަށް ދޫކޮށްފައިވާ ރާއްޖެއިން މީހުން އުމްރާއަށް ގެންދިއުމާބެހޭ ހުއްދަ ވަގުތީ ގޮތުން ހިފަހައްްޓައި، އެކަން ކުންފުންޏަށް މިހާރުވަނީ އަންގާފައި.” އިސްލާމިކް މިނިސްޓްރީން ބުންޏެވެ.

އެކަމާ ގުޅޭގޮތުން އިތުރަށް ސާފުކުރަން ޖެހޭ މައުލޫމާތުތަކާއި ބަލާން ޖެހޭ ކަންކަން ބެލުމަށްފަހު އުސޫލުގެ ތެރެއިން އަޅާން ޖެހޭ ފިޔަވަޅުތައް އެ ކުންފުންޏާ ދެކޮޅަށް އަޅާނެ ކަމަށްވެސް އިސްލާމިކް މިނިސްޓްރީން ބުންޏެވެ.

އެ މައްސަލައިގައި އަލްއަބްރާރް ހައްޖު އެންޑް އުމްރާ ގްރޫޕްގެ އުމްރާވެރިންގެ ތެރެއިން މިހާތަނަށް އުމްރާގެ އަޅުކަމަށް ނުފުރި ތިބި އުމްރާވެރިންނަށް އެހީތެރިކަން ފޯރުކޮށްދެވޭނެ ގޮތަކީ ކޮބައިތޯ ބަލައި އެ ހިދުމަތަތައް ފަހިކޮށްދިނުމުގެ މަސައްކަތް އިސްލާމިކް މިނިސްޓްރީން ކުރަމުން އަންނަ ކަމަށްވެސް އެ މިނިސްޓްރީން ބުންޏެވެ.

މި މައްސަލައިގައި އިސްލާމިކް މިނިސްޓްރީއާއި މޯލްޑިވްސް ހައްޖު ކޯޕްރޭޝަނުން އަންނަނީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން އުމްރާވެރިން ފުރުމުގެ ކަންތައް ހަމަޖެއްސުމަށް ޗާޓަރު ފްލައިޓެއް ހަމަޖެއްސުމަށް މަސައްކަތް ކުރަމުން ކަމަށްވެސް އިސްލާމިކް މިނިސްޓްރީން ބުނެއެވެ.