ރާއްޖޭގައި ހުރި ރުއްތަކުގެ މަތިވަރު ހަލާކުވެފައިވާތީ، ރުއް އާލާކުރުމުގެ މައި މަރުކަޒެއް އދ. އަރިޔަދޫގައި ގާއިމްކުރަން ސަރުކާރުން ނިންމައިފިއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި އެގްރިކަލްޗާ މިނިސްޓަރު ޑރ. މަރިޔަމް މާރިޔާ ވިދާޅުވީ، ރުއް އާލާކުރުމުގެ ގައުމީ ޕޮރޮގްރާމެއް މިހާރު ފަށާފައިވާ ކަމަށެވެ.

މިނިސްޓަރު ވިދާޅުވީ، ރާއްޖޭގައި މިހާރު ހުރީ ގިނަ ދުވަސްވެ، ފަސޭހައިން އެރޭ ވަރަށް ވުރެ ދިގުވެ، މަތިވަރު ހަލާކުވެފައިވާ ރުއްތަކެއް ކަމަށެވެ. އެ ކަމަށް ހައްލެއް ގެނައުމަށް ރުއް އާލާކުރުމަށް ނިންމާފައިވާކަން މިނިސްޓަރު ވިދާޅުވިއެވެ.

“މިކަމަށް ހައްލެއް ގެނައުމަށް އދ. އަރިޔަދޫގައި ރުއް އާލާކުރުމުގެ މައި މަރުކަޒެއް ގާއިމުކުރުމަށް މިހާރު ވަނީ އެ ރަށް މިނިސްޓްރީއާ ހަވާލުކޮށްފައި،” މިނިސްޓަރު ވިދާޅުވިއެވެ.

އެ ޕްރޮގްރާމުގެ ތެރެއިން އަރިޔަދޫގެ ތިމާވެށީގެ އެސެސްމަންޓާއި ލޭންޑް ޔޫސް ޕްލޭން ހެދުމުގެ މަސައްކަތް ކުރަމުން އަންނަ ކަމަށް މާރިޔާ ވިދާޅުވިއެވެ. އެ މަސައްކަތްތައް ނިމި، ލޭންޑް ޔޫސް ޕްލޭނާ އެއްގޮތަށް އިންވެސްޓް ކުރުމަށް އިއުލާނު ކުރެވޭނެކަން މިނިސްޓަރު ފާހަގަކުރެއްވިއެވެ.