އަންނަ މަހުގެ ހަތަރުވަނަ ދުވަހު ބާއްވަން ހަމަޖެހިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ކެންޑިޑޭޓުންގެ މަންދޫބަކަށް ވާން ކުރިމަތިލުމަށް ހުޅުވާލި ފުރުސަތު އިލެކްޝަން ކޮމިޝަން (އީސީ)އިން އިތުރުކޮށްފި އެވެ.
އީސީން ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ކެންޑިޑޭޓުންގެ މަންދޫބަކަށްވުމުގެ ފުރުސަތު ހުޅުވާލީ އަންނަ ހޮނިހިރު ދުވަހުގެ 13:00 ގެ ނިޔަލަށް ހަމަވާ ގޮތަށެވެ.
ނަމަވެސް އޭގެ ފަހުން ކުރި އިއުލާނުގައި ވަނީ އެ މުއްދަތު އަންނަ ހަފުތާގެ އަންގާރަ ދުވަހުގެ 13:00 އަށް އިތުރުކޮށްފައެވެ.
ވޯޓުނެގުމާއި ވޯޓު ގުނުމުގެ ކަންތައްތައް ހިނގާ ނުހިނގާ ގޮތް ބެލުމަށް، އެ ކެންޑިޑޭޓެއްގެ މަސްލަހަތު ހިމެނޭ ކޮންމެ މަރުކަޒަކަށް އެއް މަންދޫބަކު އައްޔަން ކުރުމުގެ ފުރުސަތު ކޮންމެ ކެންޑިޑޭޓަކަށްވެސް ލިބޭނެއެވެ.
މި އިންތިހާބުގައި ކެންޑިޑޭޓުގެ މަންދޫބަކަށް ވުމަށް އެދޭ ފަރާތްތަކުގެ ފޯމު ކޮމިޝަނަށް ހުށަހަޅާނީ، ކޮމިޝަނުގެ މައި ޕޯޓަލް my.elections.gov.mv މެދުވެރިކޮށް ކެންޑިޑޭޓުންނެވެ. އެގޮތުން މަންދޫބުންގެ މައުލޫމާތު މައި ޕޯޓަލްއަށް ހުށަހެޅުމުން، މަންދޫބެއްގެ ގޮތުގައި ހަރަކާތްތެރިވުމަށް ކަނޑައެޅި ފަރާތުން އިގުރާރު ވާނީ އެމީހެއްގެ ވެރިފައިޑް އީފާސް މެދުވެރިކޮށް މައި ޕޯޓަލްގެ ތެރެއިންނެވެ.
ކެންޑިޑޭޓުންގެ މަންދޫބުންގެ ގޮތުގައި ހަރަކާތްތެރިވާ ފަރާތްތަކުން، ކެންޑިޑޭޓުންގެ ސުލޫކީ މިންގަނޑާ އެއްގޮތަށް އަމަލުތައް ބެހެއްޓުމަށް ސަމާލުކަން ދޭންވާނެބކަމަށް އީސީން ބުނެއެވެ. އަދި ކެންޑިޑޭޓުންގެ މަންދޫބުންނަށް އީސީން ބާއްވާ މައުލޫމާތު ސެޝަނުގައި ބައިވެރިވުމަކީ މުހިންމުކަމެއް ކަމަށްވެސް އީސީން ބުންޏެވެ.
ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު 2026 ގެ ވޯޓު ނެގުމަށް ހަމަޖެހިފައިވަނީ، އަންނަ މަހުގެ ހަތަރެއްވާ ހޮނިހިރު ދުވަހުގެ ހެނދުނު 08:00 އިން ހަވީރު 04:00 އަށެވެ.
ކިޔުންތެރިންގެ ހިޔާލު