އީރާނުން ދެމުންގެންދާ ހަމަލާތަކުގައި މިހާތަނަށް އެމެރިކާ ސިފައިންގެ 560 މީހުން މަރާލެވި އަދި ޒަޚަމްކޮށްލެވިފައިވާ ކަމަށް އީރާނު އަސްކަރިއްޔާއިން ހާމަކޮށްފިއެވެ.

މިކަން ހާމަކުރީ، ހަނގުރާމައިގެ އެންމެ ފަހުގެ މައުލޫމާތު މީޑިއާއާ ހިއްސާ ކުރައްވަމުން އީރާނު އަސްކަރިއްޔާގެ ތަރުޖަމާނެވެ.

ދެވަނަ ދުވަހުގެ ހަމަލާތަކާ ގުޅޭގޮތުން ތަރުޖަމާނު ވިދާޅުވީ، ކުވައިތުގައި ގާއިމްކޮށްފައިވާ އެމެރިކާގެ އަސްކަރީ ބޭހަށް ދެވުނު ހަމަލާތަކުގައި އަލުން ބޭނުން ނުކުރެވެ ވަރަށް ހަލާކޮކޮށްލެވިފައިވާ ކަމަށެވެ.

ބަހްރެއިންގައި ގާއިމްކޮށްފައިވާ އެމެރިކާގެ އަސްކަރީ ބޭހަށް ޑްރޯން ހަމަލާތައްދީ ބޮޑެތި ގެއްލުންތައް ދެވިފައިވާ ކަމަށްވެސް ތަރުޖަމާނު ވިދާޅުވިއެވެ. ބަހްރެއިންގައި އޮންނަ އެމެރިކާގެ އަސްކަރީ ބޭހަށް ދެވުނު ހަމަލާތަކަށްފަހު ބޮޑެތި ގޮވުންތައް ގޮވައި ހުޅުރޯވެފައިވާ މަންޒަރު ފެންނަ ވީޑިއޯތައް ސޯޝަލް މީޑިއާގައި ދައުރުވާން ފަށާފައި ވެއެވެ.

މީގެއިތުރުން، އެމެރިކާއިން އަރަބި ކަނޑަސް ފޮނުވާފައިވާ ކަނޑުގެ ބިޔަ ދެ ލަޝްކަރުގެ ތެރެއިން ފުރަތަމަ ލަޝްކަރުގައި ހިމެނޭ ހަނގުރާމައިގެ އެންމެބޮޑު މަނަވަރު ކަމަށްވާ އަބްރަހަމް ލިންކަންއަށް 4 މިސައިލް ހަމަލާ ދިންކަންވެސް އީރާނު އަސްކަރިއްޔާގެެ ތަރުޖަމާނު އިއުލާން ކުރެއްވިއެވެ.

އެމެރިކާގެ ކަނޑުގެ ލަޝްކަރަށާއި، އެ ލަޝްކަރުތަކުގައި ހިމެނޭ ބައެއް މަނަވަރުތަކަށް އީރާނު ސިފައިން ހަމަލާދީ ގޮއްވާލާ މަންޒަރުތަކުގެ ވީޑިއޯތައްވެސް އާންމުވެފައި ވެއެވެ. އެގެ ބައެއް ވީޑިއޯތައް ދުނިޔޭގެ މީޑިއާ ވަސީލަތްތަކުން ވެރިފައިވެސް ކޮށްފައި ވެއެވެ.

އެހެން ނަމަވެސް އެމެރިކާގެ ދިފާއީ ވުޒާރާއާއި، އެމެރިކާގެ ސެންޓްރަލް ކޮމާންޑުން އަދިވެސް ގެންދަނީ އެ ވާހަކަތައް ދޮގު ކުރަމުންނެވެ. އެމެރިކާއިން ބުނަނީ، އަބްރަހަމް ލިންކަންއަށް އެއްވެސް ހަމަލާއެއް އަމާޒު ނުވާ ކަމަށެވެ.

ހަނގުރާމަ ފަށައިފިނަމަ އެމެރިކާގެ ކަނޑުގެ އެންމެ ވަރުގަދަ “ފިޔަ” ބިންދާލުމުގެ ގޮތުން، އަބްރަހަމް ލިންކަން ފައްތާލުމަކީ އީރާނު އަސްކަރިއްޔާއިން ކުރިންވެސް ވައުދުވެފައިވާ ކަމެކެވެ.

އީރާނު އަސްކަރިއްޔާގެ ތަރުޖަމާނު ވިދާޅުވީ، އީރާނުގެ ފައުޖުތަކުން ވޭތުވެދިޔަ ދެދުވަސްމަތިން އެމެރިކާގެ ބޭސްތަކަށާއި، ކަނޑުގެ ލަޝްކަރުތަކަށް އަމާޒުކޮށް ދިން ހަމަލާތަކުގައި އެމެރިކާ ސިފައިންގެ 560 މީހުން މަރާލެވި އަދި ޒަޚަމް ކޮށްލެވިފައިވާ ކަމަށެވެ.

މަރާލެވުނު މީހުންގެ ތެރޭގައި އެމެރިކާގެ ސެންޓްރަލް ކޮމާންޑުގެ 8 ޖެނެރަލުންވެސް ހިމެނޭ ކަމަށް ރިޕޯޓްތައް ބުނެއެވެ.

އެމެރިކާއިން މިހާތަނަށް ބުނެފައިވަނީ އީރާނުގެ ހަމަލާތަކުގައި މަރުވީ ސިފައިންގެ 3 މީހުން ކަމަށާއި، ސިފައިންގެ އިތުރު 5 މީހެއްގެ ހާލު ސީރިއަސް ކަމަށްވެސް ބުނެފައި ވެއެވެ.

ފަހުން ލިބުނު ރިޕޯޓްތައް ބުނާގޮތުގައި، މަރުވި ކަމަށް އެމެރިކާއިން ހާމަކުރި ސިފައިންގެ ތިން މީހުން މަރުވީ އީރާނުން ކުވައިތުގައި އޮންނަ އެމެރިކާގެ ބޭހަށް ދިން ހަމަލާތަކުގައެވެ.

އީރާނުންވަނީ އެމެރިކާއިން މެދުއިރުމަތީގައި ގާއިމްކޮށްފައިވާ 13 އަސްކަރީ ބޭހާއި، އެއަރބޭސްއަށް ހަމަލާދީ ހަލާކުކޮށްލާފައެވެ.

ގަތަރުގައި ގާއިމްކޮށްފައި ހުރި އެމެރިކާގެ ސެންޓްރަލް ކޮމާންޑުގެ “ލޯ” ކަމަށްވާ ބެލިސްޓިކް މިސައިލް އަންނަ ކަމުގެ އިންޒާރު ދުރާލާދޭ ރާޑަރު އީރާނުންވަނީ ގޮއްވާލާފައެވެ. މިއީ، 1.1 ބިލިއަން އެމެރިކާ ޑޮލަރުގެ އަގުހުރި ރާޑާރެކެވެ.

އީރާނާ މަތިކޮށްފައި، އެމެރިކާގެ ހަނގުރާމައިގެ ރައީސް ޓްރަމްޕް އީރާނާ ވާހަކަ ދައްކަން އޭނާ އެއްބަސްވެއްޖައިން ކަމަށް ބުނީ، ކަމެއް ވެގެންނެވެ.