ރާއްޖެއާއި ސައުދީގެ ގުޅުން އިތުރަށް ވަރުގަދަވަމުންދާކަން އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޔަޙްޔާ ޙަސަން އަލް ޤަޙްޠާނީ ފާހަގަކުރައްވައިފިއެވެ.

ސައުދީ އަރަބިއްޔާގެ ތައުސީސީ ދުވަސް ފާހަގަކުރުމަށް ބޭއްވި ރަސްމިއްޔާތުގައި، އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޔަޙްޔާ ޙަސަން އަލް ޤަޙްޠާނީ ވަނީ ރާއްޖެއާއި ސައުދީއާ ދެމެދު އޮތް ޒަމާންވީ ގާތް ގުޅުން މިހާރު ކުރިއަށްވުރެ ބަދަހިވެފައިވާކަން ހާމަކުރައްވާފައެވެ. މި ރަސްމިއްޔާތުގައި ދައުލަތުގެ ވަޒީރުންނާއި އިސް ބޭފުޅުން ބައިވެރިވެވަޑައިގެންނެވިއެވެ.

ސަފީރުގެ ވާހަކަފުޅުގައި ދެ ގައުމުގެ ދެމެދުގައި އޮތް އިތުބާރާއި ބަދަހި ގުޅުމުގެ ސަބަބުން އެކި ދާއިރާތަކުން ކުރިއެރުން ލިބެމުންދާކަން ފާހަގަކުރެއްވިއެވެ. އަދި ކުރިއަށް އޮތް ތަނުގައިވެސް މި ގުޅުން އިތުރަށް ވަރުގަދަވާނެ ކަމަށް އުންމީދު ކުރައްވާ ކަމަށާއި، ސައުދީގެ ލީޑާޝިޕާއި ތާރީޚާމެދު ފަޚުރުވެރިވާ ކަމަށް ވިދާޅުވިއެވެ.

މި މުނާސަބަތުގައި ސައުދީ ރަސްގެފާނަށާއި ވަލީއަހުދަށް ސަފީރު މަރުހަބާ ދެންނެވިއެވެ. ސައުދީގެ ތައުސީސީ ދުވަހުގެ ގޮތުގައި ކޮންމެ އަހަރެއްގެ ފެބްރުއަރީ 22 ވަނަ ދުވަސް ފާހަގަކުރަނީ އެ ގައުމުގެ ފުރަތަމަ ދައުލަތް އުފެދުނު ދުވަހާ ގުޅުވައިގެންނެވެ.