އަންނަ އޭޕްރިލް މަހު ބާއްވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރަން މިހާތަނަށް 1700 އަށްވުރެ ގިނަ ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަނުން ހާމަކޮށްފިއެވެ.
މި އިންތިހާބުތަކަށް ކުރިމަތިލާން އީސީން ހުޅުވާލީ މި މަހުގެ 17 ވަނަ ދުވަހުއެވެ. އަންނަ އާދިއްތަ ދުވަހުގެ މެންދުރު 3:00 ހާއިރު ނިމޭ ގޮތަށް ކަނޑައަޅާފައިވާ ފޯމު ހުށަހެޅުމުގެ މުއްދަތުގައި މިހާތަނަށް ލޯކަލް ކައުންސިލަށް ކުރިމަތިލާން މިއަދުގެ ހެނދުނު 10:00 އާ ހަމައަށް 1010 ފޯމު ހުށަހަޅާފައިވާ ކަމަށް އީސީން މިރޭ އާންމުކުރި ތަފާސްހިސާބުތަކުން ދައްކައެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ބަލާއިރު، 734 ފޯމު ހުށަހަޅާފައިވެއެވެ.
ލޯކަލް ކައުންސިލަށް ހުށަހަޅާފައިވާ 1010 ފޯމުގެ ތެރެއިން 750 ފޯމު ޝަރުތު ހަމަވާ ފޯމުތަކެއްކަމަށް އީސީން ބުނެއެވެ. އޭގެ ތެރެއިން 617 ފޯމު ހުށަހެޅީ ސިޔާސީ ޕާޓީތަކުންނަމަ، 133 ފޯމު ހުށަހަޅާފައިވަނީ އަމިއްލަ ގޮތުންނެވެ. މީގެ އިތުރުން 183 ފޯމު ޝަރުތު ހަމަނުވާ ފޯމުތަކެއްކަމަށާއި، އޭގެ ތެރެއިން 113 ފޯމު ހުށަހެޅީ ސިޔާސީ ޕާޓީތަކުންކަމަށާއި، 70 ފޯމު ހުށަހެޅީ އަމިއްލަ ގޮތުން ކުރިމަތިލާ މީހުންކަމަށް އީސީން ބުންޏެވެ. މީގެ އިތުރުން ޝަރުތު ހަމަނުވެގެން އަލުން ހުށަހެޅި 77 ފޯމު ވެސް ވަނީ ހުށަހަޅާފައެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ބަލާއިރު، މި މުއްދަތުގައި ހުށަހަޅާފައިވާ 734 ފޯމުގެ ތެރެއިން 574 ފޯމު ޝަރުތު ހަމަވާ ފޯމުތަކެއްކަމަށް އީސީން ބުނެއެވެ. އޭގެ ތެރެއިން 488 ފޯމު ހުށަހެޅީ ސިޔާސީ ޕާޓީތަކުންނަމަ، 86 ފޯމު ހުށަހެޅީ އަމިއްލަ ގޮތުންނެވެ. ޝަރުތު ހަމަނުވާ 126 ފޯމު ވެސް އެ އަދަދުގެ ތެރޭގައި ހިމެނޭ ކަމަށް އީސީން ހާމަކުރިއެވެ.
ކިޔުންތެރިންގެ ހިޔާލު