ޗުއްޓީ ދުވަސްވަރާ ދިމާކޮށް މޯލްޑިވިއަން އިން ކުރި ބައިނަލްއަގުވާމީ ދަތުރުތަކުގައި މެލޭޝިއާ އާއި ތައިލެންޑަށް 2،000 އަށް ވުރެ ގިނަ ފަސިންޖަރުން އުފުލާފައިވާ ކަމަށް އެ އެއާލައިނުން ހާމަކޮށްފިއެވެ. ގިނަ ފްލައިޓުތައް ފުލްކޮށް ދަތުރުކޮށްފައިވާއިރު، އާންމުންގެ ބޮޑު ތަރުހީބެއް މި ދަތުރުތަކަށް ލިބިފައިވާކަން ފާހަގަކުރެވެއެވެ.

ބައިނަލްއަގުވާމީ ދަތުރުތަކުގެ ތެރެއިން އިންޑިއާގެ ޓްރިވެންޑްރަމާއި ކޮޗިންގެ އިތުރުން ސައުދީ އަރަބިއްޔާގެ ޖިއްދާއަށް ވެސް ހާއްސަ ދަތުރުތަކެއް ވަނީ ކޮށްފައެވެ. މީގެ އިތުރުން ރާއްޖޭގެ އެތެރޭގެ އުދުހުންތަކަށް ބާރުބޮޑުވި މި ދުވަސްވަރު 500 އަށް ވުރެ ގިނަ ޑޮމެސްޓިކް ދަތުރުތަކާއި ސީޕްލޭން ދަތުރުތައް ވެސް ވަނީ އިތުރުކޮށްފައެވެ.

މިދިޔަ ޑިސެމްބަރު މަހުން ފެށިގެން މި މަހުގެ ނިޔަލަށް މޯލްޑިވިއަން އިން ދަތުރުކުރާ 17 މަންޒިލަކަށް ޖުމްލަ 3،700 އަށް ވުރެ ގިނަ ފްލައިޓް ދަތުރުކުރާނެ ކަމަށް ލަފާކުރެވެއެވެ. މި ދަތުރުތަކުން ގާތްގަނޑަކަށް 197،000 މީހުންނަށް ދަތުރުކުރުމުގެ ފުރުސަތު ލިބިގެންދާނެއެވެ.