ހުޅުމާލޭ ވިޔަފާރި ބަނދަރުގައި ހުއްޓައި ގެއްލުނު 13 މިލިއަނަށް ވުރެ ގިނަ ސިނގިރޭޓުން މަންފާ ނަގައި، އެ ވައްކަމުގައި ބައިވެރިވީ މީހުން ފައިސާ ބޭނުން ކުރީ ޖުވާ ކުޅުމަށްކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވެއްޖެއެވެ.
ނާޒިމް މިހެން ވިދާޅުވީ ޖުވާ ކުޅުމަކީ ކުށެއްގެ ގޮތުގައި ގާނޫނުލްއުގޫބާތުގައި ހިމެނުމަށް ހުށަހަޅާފައިވާ އިސްލާހަށް ބަހުސްކުރައްވަމުންނެވެ.
އޭނާ ވިދާޅުވީ ސިނގިރޭޓްތައް އެ ވަގަށް ނެގި މީހުން މަސަައްކަތް ކުރީ އިތުރު މަންފާތަކެއް އެކަމުން ހާސިލުކުރުމަށް ކަމަށާއި ޖުވާ ކުޅެގެން އެ ފައިސާ ގެއްލިފައިވާ ކަމަށެވެ.
“އެންމެ ބޮޑު ވައްކަމެއްގެ ގޮތުގައި މި ފާހަގަކުރެވުނު ސިނގިރޭޓުގެ ވަގުކަމުގެ ތެރޭގައިވެސް އަޅުގަނޑުމެންނަށް މައުލޫމާތު ލިބިފައިވާ ގޮތުގައި އެކަމުގެ ފައިސާ ލިބުނު ފަރާތްތަކުން ވަނީ އެ ފައިސާ ބެޓްކޮށް އަދި ޖުވާ ކުޅެ އޭގެން ނަފާ ހޯދަން މަސައްކަތްކޮށް އެ ހުރިހާ ފައިސާއެއް ގެއްލިފައި. އަދި އެފަރާތްތަކުން އެ ޖުވާކުޅެގެން އެފަރާތްތަކަށް ލިބުނު ފައިދާ އެ ފަރާތްތަކުގެ އެކައުންޓުތަކަށް ޖަމާކޮށްދޭން ވެސް ވަކި ކުންފުނިތަކެއް ހަދާފަ ޖުވާކުޅޭ މީހުން ހުރިކަންވެސް އެކަމުގެ ތެރެއިން އެނގިފައިވޭ… މީގެއިން އަޅުގަނޑުމެންނަށް އެނގޭ އެއްޗަކީ ވަރަށް ފުޅާ ދާއިރާއެއްގައި މި އަދި އަޅުގަނޑުމެންގެ މުޖުތަމައުގަ އަޅުގަނޑުމެންގެ ލޯމައްޗަށް މި ފެންނަ ވަރަށްވުރެ މާ ފުންކޮށް އެކަން ހިނގަމުންދާކަން،” ނާޒިމް ވިދާޅުވިއެވެ.
ޖުވާކުޅެގެން ލިބޭ ފައިސާ ޖަމާކުރުމަށް ރާއްޖޭގައި ރަޖިސްޓްރީކޮށްފައިވާ ކުންފުނިތައް ބޭނުންކުރާ ކަމަށް ވެސް އޭނާ ވިދާޅުވިއެވެ.
ނާޒިމް ވިދާޅުވީ ޖުވާ ކުޅުމަކީ އާއިލާތައް ހަލާކުވެ، މީހުންގެ މުދާ ގެއްލި، ދަރަނިވެރިވާ ކަމެއް ކަމަށެވެ. އަދި މިއީ ދެވިހިފާ ކަމަކަށްވާތީ، މުޖުތަމައު ސަލާމަތްކުރުމަށް ގާނޫނީ ގޮތުން ހަރުކަށި ފިޔަވަޅުތަކެއް އަޅަންޖެހޭކަމަށް އޭނާ ވިދާޅުވިއެވެ.
ކިޔުންތެރިންގެ ހިޔާލު