އޮތެންޓިކް މޯލްޑިވްސްގައި ރަޖިސްޓާ ވެފައިވާ ފަރާތްތަކަށް، އެ ފަރާތްތަކުގެ އުފެއްދުންތައް އަލީބާބާ.ކޮމްގައި ވިއްކޭނެ ގޮތް މިއަދުން ފެށިގެން ހަމަޖެހިފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ކުދި އަދި މެދުފަންތީގެ ވިޔަފާރިވެރިންނާ އެކު ބޭއްވެވި ބައްދަލުކުރެއްވުމުގައި ރައީސް ވިދާޅުވީ ކުރިއޭޓިވް އިންޑަސްޓްރީގައި ތަކެތި އުފައްދައިގެން އޮންލައިންކޮށް ވިއްކަމުންދާ ފަރާތްތަކާ ގުޅިފައިވާ ވަރަށް ގިނަ ކަންކަން ސަރުކާރުން ކުރަމުންދާ ކަމަށެވެ. އަދި އެ އިންޑަސްޓްރީ އިތުރަށް ފުޅާކޮށް ދުނިޔޭގެ އެކި ކަންކޮޅުތަކަށް ވިއްކޭނެ އިންތިޒާމުތައް ހަމަޖައްސައިދިނުމަކީ މި ސަރުކާރުގެ އެއް މެނިފެސްޓޯ ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ ޕޭޕަލްއާ އެކު ވަރަށް ބޮޑު ކުރިއެރުމެއް ހޯދިފައިވާ ކަމަށާއި އެގޮތުން ސެޓަމް އެއްކޮށް ނިމި، ޖެނުއަރީގައި ޕޭޕަލް މެދުވެރިކޮށް ޕޭމެންޓް ހެދޭނެ އިންތިޒާމުތައް ހަމަޖެހިގެންދާނެ ކަމަށެވެ.

“އޮތެންޓިކް މޯލްޑިވްސްގައި ރަޖިސްޓާ ވެފައިވާ ފަރާތްތަކުން އަލީބާބާގައި ޕްރޮޑަކްޓްސްތައް ވިއްކޭނެ ގޮތް މިއަދު މި ހަމަޖެހުނީ. އެއީ އަލީބާބާގައި ރެޖިސްޓްރީވެފައި މިވަނީ 400 ވެންޑަރުން. އެފަރާތްތަކަށް މިހާރު އަލީބާބާގައި އެކްސެސް ލިބިގެން ގޮސްފައި އެވަނީ،” ރައީސް

ރައީސް ވިދާޅުވީ އަލީބާބާގައި ތަކެތި ވިއްކުމަށްޓަކައި އޮތެންޓިކް މޯލްޑިވްސްގައި ރަޖިސްޓާ ވާން ޖެހޭނެ ކަމަށާއި އޭގައި ރަޖިސްޓާ ވުމުން، އަލީބާބާގައި ޕްރޮޑަކްޓްތައް ވިއްކުމަށް އެކްސެސް ލިބިގެންދާނެ ކަމަށެވެ.

މީގެ އިތުރުން ބޭންކް އޮފް މޯލްޑިވްސް އިން ތައްޔާރުކޮށްފައިވާ “މޯލްޑިވިއަން ޕޭޕަލް”، ސުވައިޕްގެ މަސައްކަތް ވެސް ނިމިފައިވާ ކަމަށާއި މިމަހުގެ ތެރޭގައި ސްވައިޕްގެ ބީޓާއަށް ހުޅުވާލާނެ ކަމަށެވެ. އަދި އަންނަ އަހަރުގެ ފުރަތަމަ ކުއާޓާގެ ތެރޭގައި ބޭރުގެ ނެޓްވޯކްތަކާ އިންޓަގްރޭޓެޑް ކުރެވި، އިތުރު ޗާޖަކާ ނުލައި ބޭރުން ފައިސާ ގެނެވޭނެ އިންތިޒާމު އެ ފެސިލިޓީގެ ތެރެއިން ހަމަޖެހިގެންދާނެ ކަމަށް ވެސް ރައީސް ވިދާޅުވިއެވެ.