ދުބާއީ އާއި ސިންގަޕޫރު ފަދަ ތަންތަން މިސާލަކަށް ނަގައި ރާއްޖެ ތަރައްގީކުރަން ބޭނުންނަމަ މުރާލިކަމާއެކު މަސައްކަތްކުރަން ޖެހޭ ކަމަށް، ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމް މިއަދު ވިދާޅުވެއްޖެއެވެ.
އަންނަ އަހަރަށް ލަފާކޮށް ސަރުކާރުން މަޖިލީހަށް ހުށަހަޅާފައިވާ ދައުލަތުގެ ބަޖެޓަށް ބަހުސް ކުރައްވަމުން ނާޒިމް ވިދާޅުވީ ސިންގަޕޫރަށާއި ދުބާއީއަށާއި އަބޫދާބީ ފަދަ ތަންތަންހެން ރާއްޖެ ތަރައްގީވާން ދިވެހީން ބޭނުންވާ ކަމަށެވެ. ނަމަވެސް އެކަން ކުރުމަށްޓަކައި މަސައްކަތްކޮށް އާމްދަނީ ހޯދުން މުހިންމު ކަމަށް އޭނާ ވިދާޅުވިއެވެ.
“ރައްޔިތުންނަކީވެސް މަސައްކަތްކުރަން ކެރޭ، މުރާލި ބަޔަކަށްވެސް ވާން އެބަޖެހޭ، މިހާރު ވަރަށް ގިނަ މީހުން ބޭނުންވަނީ ވަޒީފާވެސް ބޭނުންވަނީ މަސައްކަތްނުކުރާ ގޮތަށް، އެގޮތަށް ވަރަށް ސާފުކޮށް ބުނަންވެސް ބުނޭ،” ނާޒިމް ވިދާޅުވިއެވެ.
ގައުމެއް ކުރިއަރައިގެން ދިޔުމުގައި އަމިއްލަ ފަރުދުންގެ ހިއްސާ ވަރަށް ބޮޑުކަން އޭނާ ފާހަގަކުރެއްވި އެވެ.
ސަރުކާރުން މުސާރައިގެ އޮނިގަނޑަށް ގެނައި ބަދަލުގެ ސަބަބުން ގާބިލު ޒުވާނުން ސިވިލް ސާވިސްއާ ގުޅި، މަސައްކަތަށް ނުކުންނާނެ ކަމަށް ގަބޫލުކުރެވޭ ކަމަށް ވެސް އޭނާ ވިދާޅުވި އެވެ.
ކިޔުންތެރިންގެ ހިޔާލު