ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގެ އެޑިޔުކޭޝަން މިނިސްޓަރު ޑރ. އައިޝަތު އަލީ އެންޓި ކޮރަޕްޝަން ކޮމިޝަން (އޭސީސީ)އަށް ހާޒިރުކޮށްފިއެވެ.
އައިޝަތު އަލީ މިއަދު ހެނދުނު އޭސީސީއަށް ހާޒިރުކުރީ ސްވިފްޓް އިންޖިއަރިން ޕްރައިވެޓް ލިމިޓެޑަށް ހައްގު ނޫން ބަދަލެއް މިދިޔަ ސަރުކާރުން ދިން ކަމަށް ތުހުމަތުކުރެވޭ މައްސަލައާ ގުޅިގެންނެވެ.
އޭސީސީއަށް ހާޒިރުވުމަށްފަހު ނޫސްވެރިންނަށް މައުލޫމާތު ދެއްވަމުން އައިޝަތު އަލީގެ ގާނޫނީ ވަކީލު އަހްމަދު މައުރޫފް ވިދާޅުވީ އެ ކޮމިޝަނުން ކުރަނީ އެއްވެސް އަސާސެއް ނެތް ތުހުމަތުތަކެއް ކަމަށެވެ.
އޭނާ ވިދާޅުވީ އެ ކުންފުންޏަށް ބަދަލުދިން މައްސަލާގައި އައިޝަތު އަލީ އަށް ޖިނާއީ ކުށެއްގެ ތުހުމަތު ކުރަންޖެހޭ ސަބަބެއް އެ ކޮމިޝަނުގެ އިންވެސްޓިގޭޝަން އޮފިސަރުންނަށް ވެސް ބުނެނުދެވުނު ކަމަށެވެ.
“ހަގީގަތުގައި އަޅުގަނޑަށް ފާހަގަކުރެވުނީ ސުވާލެއް ނުކުރެވޭ. އަޅުގަނޑަކަށް ހީއެއް ނުވޭ ކުރާ ތުހުމަތު އެބޭފުޅުންނަށް ސާފުވާހެނެއް. އެއީ ވަރަށް ގިނަ ވަގުތު ހޭދަވި ތުހުމަތު ސާފުކޮށްދޭން. އޭގައި އޮތް ދެ ކަމެއް އަޅުގަނޑުމެން ފާހަގަކުރިން، އެއް ކަމަކަށް ތުހުމަތުގައި އޮތީ ނުހައްގު ބަދަލެއް ދޭން ނިންމާފައި އޮތް ކަމަށް،” މައުރޫފް ވިދާޅުވިއެވެ.
މި މައްސަލައާ ގުޅިގެން ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒް އިސްމާއީލާއި އޭރުގެ ފިނޭންސް މިނިސްޓަރު އިބްރާހީމް އަމީރު ވެސް ވަނީ އޭސީސީއަށް ހާޒިރުކޮށްފައެވެ.
ކިޔުންތެރިންގެ ހިޔާލު