މާލީ ދާއިރާގައި ހަރަކާތްތެރިވާ މުއައްސަސާތަކުގެ ގާބިލުކަން އިތުރުކުރުމަށާއި އިންސާނީ ވަސީލަތްތައް ތަރައްގީކުރުމަށް ފުރިހަމަ އޮނިގަނޑެއް ގާއިމުކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންޓަނޭޝަނަލް އިސްލާމިކް ޔުނިވާސިޓީ އޮފް މެލޭޝިއާ (އައިއައިޔޫއެމް) އަދި ދިވެހިރާއްޖޭގެ ގައުމީ ޔުނިވާސިޓީ އާއެކު ސްޓްރެޓެޖިކް އެމްއޯޔޫއެއްގައި ސޮއިކޮށްފިއެވެ.
އެމްއެމްއޭގައި ބޭއްވި ހާއްސަ ރަސްމިއްޔާތުގައި އެމްއެމްއޭގެ ފަރާތުން އެމްއޯޔޫގައި ސޮއިކުރެއްވީ ގަވަރުނަރު އަހުމަދު މުނައްވަރެވެ. އަދި އައިއައިޔޫއެމްގެ ފާރާތުން ސޮއިކުރެއްވީ އެ ޔުނިވާސިޓީގެ ރެކްޓާ ޕްރޮފެސާ އެމެރިޓަސް ދަތުކް ޑރ. އޮސްމާން ބަކާއެވެ. އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލާ އާއިޝަތު ޝެހެނާޒް އާދަމެވެ.
އެއްބަސްވުމާ ގުޅޭގޮތުން އެމްއެމްއޭ އިން ބުނީ އެ އެއްބަސްވުންތަކުގެ ސަބަބުން މާލީ ދާއިރާގައި ހަރަކާތްތެރިވާ މުއައްސަސާތަކުގެ ގާބިލުކަން އިތުރުކުރުމަށާއި އިންސާނީ ވަސީލަތްތައް ތަރައްގީކުރުމަށް ފުރިހަމަ އޮނިގަނޑެއް ގާއިމުކުރުމުގެ މަސައްކަތް ފަށާނެ ކަމަށެވެ. އަދި ތަމްރީނު ޕްރޮގްރާމްތަކާއި އިންޓާންޝިޕް ފުރުސަތުތަކަށް އެއްބާރުލުން ދޭނެ ކަމަށެވެ.
މި މަސައްކަތްތަކުން މަރުކަޒީ ބޭންކުގެ މުވައްޒަފުންނާއި މާލީ ދާއިރާގެ ޕްރޮފެޝަނަލުންނަށް މަނިޓަރީ ސިޔާސަތު ތަންފީޒުކުރުމާއި، މާލީ ނިޒާމުތައް ދިރާސާކުރުމާއި، ޝަރީއާއާ އެއްގޮތްވާ ގޮތުގެ މަތިން ރެގިއުލޭޓްކުރުމުގެ ހުނަރުތައް ތަރައްގީކުރުމަށް އިސްކަންދޭނެ ކަމަށް އެމްއެމްއޭ އިން ބުންޏެވެ.
އަދި މި އެމްއޯޔޫގެ ދަށުން، އިސްލާމީ ބޭންކިން އަދި ފައިނޭންސްގެ ދާއިރާއިން އައިއައިޔޫއެމްގެ ބައިނަލްއަގުވާމީ ގޮތުން ފާހަގަކުރެވޭ ތަޖުރިބާ ބޭނުންކޮށްގެން، ޝަރީއާއާ އެއްގޮތްވާ ގޮތުގެ މަތިން ރެގިއުލޭޓްކުރުމުގެ އޮނިގަނޑުތައް ހަރުދަނާކުރުމަށާއި އައު އިސްލާމީ މާލީ އިންސްޓްރުމެންޓުތައް ތަރައްގީކުރުމަށް އެމްއެމްއޭއަށް އެހީތެރިވެދޭނެ ކަމަށެވެ.
މި އެއްބަސްވުމުގައި މަނިޓަރީ ސިޔާސަތު، މާލީ ހަރުދަނާކަން، އަދި ފިންޓެކް ކުރިއެރުންތަކާ ގުޅޭގޮތުން އެމްއޯޔޫގެ ބައިވެރިން އެކުގައި ދިރާސާކުރުމަށްވެސް އިސްކަންދޭނެ ކަމަށް އެމްއެމްއޭއިން ބުންޏެވެ. އެކަޑަމިކް އަދި ރެގިއުލޭޓަރީ ތަޖުރިބާ ހިއްސާކުރުމުގެ ތެރެއިން، މި ޕާޓްނާޝިޕުން މަނިޓަރީ ގަވަނަންސް އަދި މާލީ ނިޒާމުގެ ދެމެހެއްޓެނިވިކަން އިތުރުކުރުމަށް މާލީ ހެކިތަކުގެ މައްޗަށް ބިނާކޮށް ސިޔާސަތުތަކަށް ހުށަހެޅުންތައް ހުށަހެޅުމަށް މަސައްކަތްކުރާނެ ކަމަށެވެ.
އޭގެ އިތުރުން ރާއްޖޭގެ މާލީ މުއައްސަސާތަކުގެ ބިންގާ ވަރުގަދަވެ، މާލީ ދާއިރާގެ ތަޖުރިބާ އިތުރުވެ، ދެމެހެއްޓެނިވި އިގުތިސާދީ ކުރިއެރުމަށް މަގުފަހިވެގެންދާނެކަމަށް ބެލެވޭ ކަމަށެވެ.
އެމްއެމްއޭއިން އިތުރަށް ބުނީ އެމްއޯޔޫގެ ސަބަބުން:
އިސްލާމީ މާލީ ދާއިރާގައި ޚާއްސަ ތަމްރީނު ލިބިފައިވާ ޕްރޮފެޝަނަލުންގެ އަދަދު އިތުރުވުން.
ރާއްޖޭގެ މާލީ ރެގިއުލޭޓަރީ އޮނިގަނޑު ހަރުދަނާވެ، ބައިނަލްއަގުވާމީ މިންގަނޑުތަކާ އެއްހަމަވުން.
އިސްލާމީ މާލީ އުފެއްދުންތަކާއި ހިދުމަތްތައް އިތުރުވެ، ރާއްޖޭގެ މާލީ ބާޒާރު ފުޅާވުން.
މަނިޓަރީ ސިޔާސަތު އެކުލަވާލުމާއި ތަންފީޒުކުރުމުގައި ދިރާސާތަކުގެ މައްޗަށް ބިނާކޮށް ނިންމުންތައް ނިންމުން އިތުރުވުން.
ރާއްޖޭގެ މާލީ ދާއިރާގެ ދެމެހެއްޓެނިވިކަމާއި ހަރުދަނާކަން އިތުރުވުން.
އިސްލާމީ މާލީ ދާއިރާއާ ގުޅޭ ދިރާސާތަކާއި އެކަޑަމިކް މަސައްކަތްތައް އިތުރުވުން.
ސަރަހައްދީ އަދި ބައިނަލްއަގުވާމީ މާލީ މުއައްސަސާތަކާއެކު ރާއްޖޭގެ ގުޅުން ބަދަހިވުން.
ރާއްޖޭގެ މާލީ ދާއިރާގައި އިންވެސްޓްކުރުމުގެ ފުރުސަތުތައް އިތުރުވުން.
މާލީ ދާއިރާގެ އައު ޓެކްނޮލޮޖީތަކާއި އިންވެސްޓްމަންޓް ވަސީލަތްތައް ތައާރަފުވުން.
ރާއްޖޭގެ އިގުތިސޯދީ ކުރިއެރުމަށް މަގުފަހިވެ، ވަޒީފާގެ ފުރުސަތުތައް އިތުރުވުން.
މި އެމްއޯޔޫގެ ދަށުން ކުރެވޭ މަސައްކަތްތަކުގެ ކުރިއެރުން ވަޒަންކުރުމަށް މުއްދަތުތަކެއް ކަނޑައެޅި، ގަވާއިދުން މުރާޖައާކުރާނެ ކަމަށާއި މި އެއްބާރުލުމުގެ ނަތީޖާތައް އާންމުކޮށް ހިއްސާކުރާނެ ކަމަށް އެމްއެމްއޭ އިން ބުންޏެވެ.
ކިޔުންތެރިންގެ ހިޔާލު