ކުޑަކުދިންތަކެއް އެކްސްޕްލޮއިޓްކުރުމުގެ ތުޙުމަތުގައި މާލެއިން 4 މީހުން ހައްޔަރުކޮށްފިއެވެ.
ފުލުހުން ވިދާޅުވީ މި މައްސަލައިގައި 4 ކުޑަކުއްޖަކު އަނިޔާއަށް ހުށައެޅިފަވާކަމަށެވެ. މީގެތެރޭގައި ހިމެނެނީ 17 އަހަރުގެ ދެ އަންހެން ކުދިންނާ، 16 އަހަރާ 17 އަހަރުގެ ދެ ފިރިހެން ކުދިންކަމަށެވެ. ފުލުހުން ވިދާޅުވީ މި މައްސަލައިގެ ތުޙުމަތުގައި 4 މީހުން ހައްޔަރުކުރީ އިއްޔެ ހެނދުނުގެ ވަގުތުކަމަށެވެ.
ފުލުހުން ވަނީ މި މައްސަލައިގައި ފުލުހުން ހައްޔަރު ކުރި މީހުންގެ މަޢުލޫމާތު އާއްމުކޮށްފައެވެ. މައްސަލައިގައި ހިމެނެނީ މ.އެތުމާ/މާލެ އަލީ އަޝްރަފް(35އ)، ޕެރިސް/ގދ.ވާދޫ ލުހާން ސަޢީދު(41އ)، ސިލްވަރ ސްޓަރ/ވ.ރަކީދޫ ނާފިއު ރަޝީދު (39އ) އަދި ހ.ފިނިކުރި/މާލެ އިބްރާޙިމް ޝިނާން އަޙުމަދުއެވެ.
ފުލުހުން ވިދާޅުވީ އެމީހުން ހައްޔަރުކުރީ ހެންވޭރުގަ ހުންނަ ގެއެއްގެ އެޕަރޓްމަންޓެއް ބަލާ ފާސްކޮށްކަމަށެވެ. އެ އެޕަރޓްމަންޓްއިން މަސްތުވާތަކެތިކަމަށް ތުޙުމަތު ކުރެވޭ އެއްޗެއް ހުރި ޕެކެޓެއް ފެނިފަވާކަމަށެވެ. އަދި ހައްޔަރުކުރި މީހުންގެ ކުޑަކަމުދާ ތަކެތީގެ ވަގުތީ ނަތީޖާ، މަސްތުވާތަކެއްޗަށް ޕޮޒިޓިވްވެފަވާކަމަށް ފުލުހުން ވަނީ ވިދާޅުވެފައެވެ.
ފުލުހުން ވިދާޅުވި މި މައްސަލައިގެ ތުހުމަތުގައި ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 3 ދުވަހަށް ބަންދުކުރުމުގެ އަމުރެއް ނެރެފަވާކަމަށެވެ. މި މައްސަލަ ފުލުހުން ދަނީ ތަޙުޤީގުކުރަމުންނެވެ.
ކިޔުންތެރިންގެ ހިޔާލު