ހއ. ދިއްދޫގައި ހުންނަ އެ އަތޮޅު ހޮސްޕިޓަލުގެ ފަސް ބުރީގެ އާ އިމާރާތް އަޅަން އެމްޓީސީސީއާ މިއަދު ހަވާލުކޮށްފިއެވެ.
ހެލްތު މިނިސްޓްރީން ބުނީ 50 އެނދުނު އާ ހޮސްޕިޓަލް އިމާރާތާއި ސާވިސް ބިލްޑިން އެޅުމަށް އެމްޓީސީސީއާ އެކު ސޮއިކޮށްފައިވާ ކަމަށެވެ.
އެ ކުންފުނީގެ ފަރާތުން އެކަމުގެ އެއްބަސްވުމުގައި ސޮއި ކުރެއްވީ ޑެޕިއުޓީ މެނޭޖިން ޑިރެކްޓަރު އަހުމަދު ޝަރީފް އަބްދުލް ރަހްމާން ޔޫސުފެވެ. މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރު އަހުމަދު ގާސިމެވެ.
780 ދުވަހުގެ ތެރޭގައި ނިންމާ ގޮތަށް އެ މަޝްރޫއު ހަވާލުކުރީ 185.6 މިލިއަން ރުފިޔާ އަށެވެ.
އަލަށް އިމާރާތްކުރާ ފަސް ބުރީގެ އެ އިމާރާތުގައި އައިސޮލޭޝަން ފެސިލިޓީ އާއި ރޭޑިއޮލޮޖީ ޑިޕާޓްމަންޓެއް ހިމެނޭނެ އެވެ. އޭގެ ތެރޭގައި އެކްސްރޭ އާއި ސީޓީ އާއި އެމްއާރުއައި އަދި މެމޮގްރަފީ އާއި އަލްޓްރާސައުންޑް ސްކޭން ހެދޭނެ އިންތިޒާމު ހަމަޖެހޭނެ ކަމަށް ހެލްތު މިނިސްޓްރީން ބުންޏެވެ.
އެ މަޝްރޫއުގެ ތެރޭގައި ވޭސްޓް މެނޭޖްމަންޓް ސެންޓަރާއި އިންޑަސްޓްރިއަލް ލޯންޑްރީއަކާއި އޮކްސިޖަން ޕްލާންޓެއް ވެސް ހިމެނެއެވެ.
ކިޔުންތެރިންގެ ހިޔާލު