މާރާމާރީއެއްގައި ލިބުނު އަނިޔާތަކަށް ފަރުވާ ދެމުން ދަނިކޮށް, ޑޮކްޓަރުންނާއި ނަރުހުންނަށް މަރުގެ އިންޒާރުދިން ކަމުގެ ތުހުމަތުގައި ދިވެހި ޒުވާނަކު ހައްޔަރު ކޮށްފިއެވެ.

ފުލުހުން މިއަދު ބުނީ މި މައްސަލައިގެ ތުހުމަތުގައި މިދިޔަ ހުކުރު ދުވަހު ހައްޔަރު ކޮށްފައިވަނީ, ގދ. ވާދޫ, ފުރުސަތު, ލޫތު އިބްރާހީމް, 28, ކަމަށެވެ.

އޭނާ އައިޖީއެމްއެޗްގައި އެޑްމިޓް ކުރީ މިދިޔަ ހަފުތާގެ އާދިއްތަ ދުވަހުގެ ފަތިހު ހިނގި މާރާމާރީއެއްގައި ލިބުނު އަނިޔާތަކަކާ ގުޅިގެންނެވެ.

ލޫތު ވަނީ ހަމަ އެ ދުވަހުގެ މެންދުރުގެ ވަގުތެއްގައި އޭނާއަށް ފަރުވާ ދެމުންދިޔަ މެޑިކަލް ސްޓާފުންނަށް މަރުގެ އިންޒާރުދީ ބިރު ދައްކައިފައެވެ. އަދި އޭނާގެ ޖީބުން ވަޅިއެއް ފެނިފައިވާ ކަމަށް ފުލުހުން ބުންޏެވެ.

އޭނާ ހައްޔަރުކުރީ ހުކުރު ދުވަހު ކޯޓު އަމުރެއްގެ ދަށުންނެވެ. އިއްޔެ ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރު ކުރުމުން 15 ދުވަހަށް ބަންދު ކުރަން ވަނީ އަމުރުކޮށްފައެވެ.