މާލޭ ބާޒާރުގައި އޮރެންޖުގެ އަގުތައް ދަށަށްދާން ފަށައިފިއެވެ.
ރާއްޖެއިން ބޭރުން އޮރެންޖު ގަންނަން ލިބުމާއި އަދި އެނޫންވެސް ބައެއްކަހަލަ ކަންކަމާހެދި މާލޭ ބާޒާރުގައި މިފަހުން އޮރެންޖެއްގެ އަގު ވަނީ 12 ރުފިޔާއަށް އަރައިގެން ގޮސްފައެވެ. އޮރެންޖުގެ އަގުތައް ބޮޑުވަމުން އަންނަތާ ދެމަހެއްހާ ދުވަސް ވެފައިވާއިރު، މިހާރު ބާޒާރުގައި އޮރެންޖުގެ އަގުތައް ވަނީ ދަށަށްދާން ފަށާފައެވެ.
އެގޮތުން ހުޅުމާލޭގެ ބައެއް ފިހާރަތަކުގައި މިހާރު އޮރެންޖެއް 6 ރުފިޔާއަށް ލިބެންހުރިއިރު، ބައެއް ފިހާތަތަކުން ބައެއް ފަހަރު އޮރެންޖު ގެނެސް 2.50 ރުފިޔާއަށްވެސް މިހާރު ވިއްކައެވެ. ިއަދު މާލޭ ބާޒާރުމަތީ ބައެއް ފިހާރަތަކުން 5 ރުފިޔާއަށް އޮރެންޖު ލިބެންހުރިކަން ފާހަގަކޮށްލެވެއެވެ.
މާލޭ ބާޒާރުގައި އޮރެންޖުގެ އަގު އިންތިހާއަށް ބޮޑުވެ އެކަމުގެ ކަންބޮޑުވުން ރައްޔިތުން ފާޅުކުރުމުން ސަރުކާރުން ވަނީ އެސްޓީއޯ މެދުވެރިކޮށް ރައްޔިތުން އާއްމު ދިރިއުޅުމުގައި އެންމެބޮޑަށް ބޭނުންކުރާ ތަރުކާރީ އާއި މޭވާގެ ބާވަތްތައް އެތެރެކުރުމަށް ނިންމާފައެވެ. އެސްޓީއޯއިން މިހާރުވެސް ވަނީ ސުޕަމާޓަށް ހެޔޮއަގުގައި އޮރެންޖު ވިއްކަން ނެރެފައެވެ. އެސްޓީއޯއިން އޮރެންޖު ވިއްކަނީ ކިލޯއެއް 30 ރުފިޔާއަށެވެ.
އެސްޓީއޯއިން ބުނީ ދާއިމީ ގޮތެއްގައި އެކުންފުނީގެ ސުޕަމާޓުން އޮރެންޖުފަދަ ބާވަތްތައް ލިބޭނޭ އިންތިޒާމް ކުރިއަށްއޮތްތަނުގައި ހަމަޖެހިގެންދާނޭކަމަށެވެ.
އޮރެންޖަކީ ދިވެހިން އެންމެގިނައިން ބޭނުންކުރާ އެއް ބާވަތެވެ. އޮރެޖުގެ އިތުރުން އާފަލުގެ އަގުތައްވެސް ވަނީ މިއިން ޒަމާނަކު ބާޒާރުގައި އަގުތައް ނުއުފުލޭވަރަށް އުފުލިފައެވެ.
ކިޔުންތެރިންގެ ހިޔާލު