ރާއްޖެއަށް ދިމާވެފައިވާ މާލީ ދަތިތަކުން އަރައިގަތުމުގައި ޗައިނާގެ ފުރިހަމަ އެއްބާރުލުމާއި އެހީތެރިކަން ރާއްޖެއަށް ލިބޭނެކަމަށް ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު ކޮންގް ޒިއަންހުއާ ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ސަފީރު ވިދާޅުވީ، ރާއްޖެއަށް ދިމާވެފައިވާ މާލީ ދަތިތަކުން އަރައިގަތުމަށްޓަކައި ޗައިނާއިން އެހީވުމަށް ދިވެހި ސަރުކާރާއެކު ރޭވުންތަކެއް ރާވަމުންދާ ކަމަށެވެ. އެގޮތުން މިކަމުގެ ކަރުދާސް މަސައްކަތްތައް މިމަހުގެ ނިޔަލަށް ނިންމާލެވޭނެކަމަށް ސަފީރު ވިދާޅުވިއެވެ.
ރާއްޖެއަށް އެހީދިނުމަށް ނިންމާފައިވަނީ އިތުރު މާލީ ބުރައެއް ރާއްޖެއަށް އުފުލަންނުޖެހޭނެ ގޮތަށް ކަމަށް ވެސް ސަފީރު ވިދާޅުވިއެވެ.
“ދުރު ރާސްތާއެއްގައި ލޯނުތައްވެސް ދެއްކޭނެ ފަދަ ލުއި އިންތިޒާމެއް ހަމަޖެއްސުމަށް މަސައްކަތްކުރަމުންދަނީ” ސަފީރު ވިދާޅުވިއެވެ.
ޗައިނާގެ ހިލޭ އެހީގައި ވިލިމާލޭގައި ޒަމާނީ ފެންވަރުގެ ހޮސްޕިޓަލެއް އަޅަން ވެސް ވަނީ ނިންމާފައެވެ. އެ ހޮސްޕިޓަލް އެޅުމަށްޓަކައި ވިލިމާލެ ހޮސްޕިޓަލް ހުސްކޮށް ވަގުތީގޮތުން އެހެން އިމާރާތެއްގައި ހިދުމަތް ދޭން ވަނީ ފަށާފައެވެ.
ސަފީރު ވިދާޅުވީ ވިލިމާލޭގައި އަޅާ ހޮސްޕިޓަލުގެ ޑިޒައިން ބިޑިން މަރުޙަލާއަށް މިހާރު ހުޅުވާލާފައިވާ ކަމަށެވެ. މީގެއިތުރުން ވިލިމާލެއާއި މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ފަހު ތައްޔާރީތައް ކުރިއަށްދާ ކަމަށް ވެސް ސަފީރު ވިދާޅުވިއެވެ.
ޗައިނާ ސަރުކާރުގެ ހިލޭ އެހީގެ ދަށުން 50 ކައުންސިލް އިދާރާ އެޅުމުގެ މަޝްރޫޢުގެ އޮން-ސައިޓް ފީސިބިލިޓީ ސްޓަޑީ ނިމިފައިވާ ކަމަށް ވެސް ސަފީރު ވިދާޅުވިއެވެ.
ކިޔުންތެރިންގެ ހިޔާލު