ރަތްކަނޑުން ދަތުރުކުރި އިސްރާއީލުގެ ތެޔޮ ޓޭންކަރަކަށް، ޔަމަނުގެ ހޫޘީން ބެލިސްޓިކް މިސައިލް ހަމަލާއެއް ދީފިއެވެ.

ހޫޘީ އަސްކަރިއްޔާގެ ތަރުޖަމާނު ވިދާޅުވީ، ހަމަލާދިނީ އިސްރާއީލަށް ނިސްބަތްވާ “ސްކާލެޓް ރޭ” ނަމަކަށް ކިޔާ ޓޭންކަރަށް ކަމަށާއި، ބެލިސްޓިކް މިސައިލް ސީދާ ބޯޓަށް އަމާޒުވި ކަމަށެވެ.

މި ހަމަލާގައި ބޯޓަށް ލިބުނު ގެއްލުމާ ގުޅޭ ތަފްސީލެއް އަދި ނުލިބެއެވެ.

އިނގިރޭސި މެރިޓަމް ސެކިއުރިޓީ އިދާރާ، އެމްބްރޭއިން ބުނެފައިވަނީ، ސައުދީ ރަތްކަނޑުގެ ސައުދީ އަރަބިއްޔާ ސަރަހައްދުން ދަތުރުކުރި ތެޔޮ ޓޭންކަރެއް ކައިރީގައި ބާރުގަދަ ގޮވުމެއް ގޮވިކަމަށް ރިޕޯޓް ކޮށްފައިވާ ކަމަށެވެ.

މިކަމާ ގުޅޭގޮތުން އިސްރާއީލުން އަދި އެއްވެސް އެއްޗެއް ނުބުނެއެވެ.

ރަތްކަނޑުން ދަތުރުކުރި އިސްރާއީލުގެ ތެޔޮ ޓޭންކަރަކަށް ހޫޘީން  މިސައިލް ހަމަލާއެއް މިދިނީ، އިސްރާއީލުން މިދިޔަ ބުރާސްފަތިދުވަހު ޔަމަނުގެ ވެރިރަށް ސަންޢާއަށް ދިން  ވަރުގަދަ ވައިގެ ހަމަލާތަކެއްގައި، ހޫޘީންގެ ސަރުކާރުގެ ބޮޑުވަޒީރާއި، ކެބިނެޓް އެތައް ވަޒީރުން އަވަހާރަކޮށްލުމުން، އެކަމުގެ ބަދަލު ވަރަށް ވޭންދެނިވި ގޮތެއްގައި ހިފާނޭކަމުގެ އިންޒާރު ދިނުމަށް ފަހުގައެވެ.

ހޫޘީ ސަރުކާރުގެ ރައީސް އަދި ސުޕްރީމް ޕޮލިޓިކަލް ކައުންސިލްގެ ރައީސް މަހްދީ އަލް-މަޝްއަތު ވިދާޅުވެފައިވަނީ، ކުރިއަށް ހުރީ އިސްތިއުމާރީ ބާރަށް ނާމާން، ކަޅު ދުވަސްތަކެއް ކަމަށެވެ.

ހޫޘީން ދެން ފަށާ އޮޕަރޭޝަންގައި ޒަޔަނިސްޓު ދައުލަތް މުލުން ލުހެލާނެ ކަމަށްވެސް އިންޒާރުގައި ވެއެވެ.

މި މަސައްކަތުގެ ދަށުން، ސަންޢާގައި ހުންނަ އދގެ އޮފީސް އިއްޔެ ރެއިޑްކޮށް 11 މީހުން ހައްޔަރު ކޮށްފައި ވެއެވެ. މިއީ، އދގެ ތޮފި އަޅައިގެން އިސްރާއީލަށް ޖާސޫސްކޮށްދޭ މީހުން ކަމަށް، ޙޫޘީން ބުނެއެވެ.