ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ލެޕްޓޮޕްތަކެއް ވަގަށް ނަގައި އެ ތަކެތި ވިއްކާލި މީހަކު ނުވަ މަހުގެ މުއްދަތަކަށް ޖަލަށްލާން ހުކުމްކޮށްފިއެވެ.
ކުރިމިނަލް ކޯޓުން އެ މައްސަލައިގައި ހުކުމްކުރީ ތ. ގާދިއްފުށީ، މިރިޔާސްގެ، ހަސަން ޝަކީބުގެ މައްޗަށެވެ. ދައުލަތުގެ ފަރާތުން އޭނާއަށް ކުރީ އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.
ދައުލަތުން އޭނާގެ މައްޗަށް އެ ދައުވާ ކޮށްފައިވަނީ މިދިޔަ އަހަރުގެ ޑިސެމްބަރު 21 ގައި ހުޅުމާލެ ފޭސް ދޭއްގައި ހުންނަ އެޗްޑީސީގެ ޕްރޮޖެކްޓް މެނޭޖްމަންޓް ޑިވެލޮޕްމަންޓް އޮފީހަށް ވަދެ، އެތަނުން ލެޕްޓޮޕްތަކެއް ވަގަށް ނަގާފައިވާ ކަމަށް ފުލުހުންނަށް ހުށަހަޅާފައިވަނިކޮށް، އެ ދުވަހުގެ ހެނދުނު 10:00 ހާއިރު އެތަކެތި ބ. ފުޅަދޫ، އުދަރެސް، ހަސަން އަޒްލީފަށް 1700 ރުފިޔާއަށް ވިއްކާލާފައިވާތީއެވެ.
އޭނާ ނެގި ފަސް ލެޕްޓޮޕް ތެރޭގައި ހިމެނެނީ، ޑެލް ލެޓިޓިއުޑް 3530 އައި 5 ބްރޭންޑްގެ ދެ ލެޕްޓޮޕާއި 3510 އައި ފަހެއް ބްރޭންޑްގެ އެއް ލެޕްޓޮޕާއި 3420 އައި ފަހެއް ބްރޭންޑްގެ ދެ ލެޕްޓޮޕެވެ.
ކޯޓުގައި އޭނާ އެކަމަށް އިއުތިރާފުވުމުން، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުން އޭނާ ކުށްވެރިވާ ކަމަށް ކަނޑައަޅައި ނުވަ މަހާއި 18 ދުވަހުގެ މުއްދަތަށް ޖަލަށްލުމަށް ކޯޓުން ވަނީ ހުކުމްކޮށްފައެވެ.
ކިޔުންތެރިންގެ ހިޔާލު