ހުޅުމާލޭ ފުރަތަމަ ފިޔަވަހީގައި އެސްޓީއޯ ސްމާޓު ސްޓޯރު ބަންދުކޮށް އެ އިމާރާތުގައި ފާމަސީއެއް ހުޅުވައިފިއެވެ.

އެސްޓީއޯއިން ބުނީ، ފާމަސީ ހުޅުވުމުގެ މަގުސަދަކީ ހުޅުމާލޭގައި ދިރިއުޅޭ ރައްޔިތުންނަށް އެސްޓީއޯގެ ސިއްހީ ޚިދުމަތްތައް ފަސޭހަކަމާ އެއްކޮށް ލިބޭނެ މަގު ތަނަވަސްކޮށްދިނުން ކަމަށެވެ.

އިއްޔެ ހުޅުބި އެ ފާމަސީން އެސްޓީއޯގެ އެހެނިހެން ފާމަސީތަކެކޭ އެއްފަދައިން، ބޭހާއި މެޑިކަލް ކޮންސިއުމަބަލްސްގެ އިތުރަށް ނެޕީއާއި ކޮސްމެޓިކްސް ފަދަ ތަކެތި ވިއްކާނެ ކަމަށް އެސްޓީއޯއިން ބުންޏެވެ.

މި ފާމަސީ ހުޅުވާފައި ހުންނާނީ ކޮންމެ ދުވަހަކު ހެނދުނު 8:00އިން ފެށިގެން މެންދަމު 12:00އާ ހަމައަށެވެ.

ސްމާޓް ސްޓޯރު ހިންގި ތަނުގައި ފާމަސީއަށް ހުޅުވާނެކަން އިއުލާނުކުރީ އެސްޓީއޯގެ 2024ވަނަ އަހަރުގެ އަހަރީ އާންމު ޖަލްސާގައި އެކުންފުނީގެ މެނޭޖިން ޑިރެކްޓަރު ޝިމާދު އިބްރާހީމެވެ.

ޝިމާދު ވިދާޅުވީ، އެތަން ފާމާސީއަކަށް ބަދަލުކުރުމަށް ނިންމީ ހުޅުމާލޭ ހޮސްޕިޓަލަށް ދާ ބަލި މީހުންނަށް ރަނގަޅު ފެންވަރުގައި ޚިދުމަތް ދޭނެ ފާމަސީއެއް ނެތް ކަމަށް ބުނެ ކުރަމުން އަންނަ ޝަކުވާތަކާ ގުޅިގެން ކަމަށެވެ.