ރާއްޖެއާއި ލަންކާއާ ދެމެދު އޮންނަ ގާތް ގުޅުމުގެ މައިގަނޑު ބިންގަލަކީ ދެ ގައުމުގެ ރައްޔިތުންގެ މެދުގައި އޮތް ގާތް ގުޅުންކަށް ރައީސް ޑރ. މުހައްމަދު މުއިޒއްޒު ވިދާޅުވެއްޖެއެވެ.

ލަންކާގެ ރައީސް އަނޫރާ ކުމާރާ ޑިސަނަޔަކަ އާއެކު މިއަދު ބޭއްވި ރަސްމީ ވާހަކަތަކުގައި ރައީސް ވިދާޅުވީ ރާއްޖެ އާއި ލަންކާ ގުޅިގެން މަސައްކަތް ކުރާނެ ގިނަ ދާއިރާތަކެއް ހޯދިއްޖެ ކަމަށެވެ. އަދި ކުރިއަތް އޮތް ތަނުގައި ދެ ގައުމުގެ ގުޅުން އިތުރަށް ވަރުގަދަވާނެ ކަމަށް އެމަނިކުފާނު ވިދާޅުވިއެވެ. އެ ދާއިރާތަކުގެ ގޮތުގައި ރައީސް ފާހަގަކުރެއްވީ، ވިޔަފާރިއާއި، ތައުލީމާއި، ދިފާއީ ދާއއިރާއާއި، ވޮކޭޝަނަލް ތަމްރީނާއި، ޒުވާނުންނާ ގުޅުން ހުރި ކަންކަމާއި، މަސްވެރިކަމާއި، ދަނޑުވެރިކަމުގެ ދާއިރާއެވެ.

ދެ ގައުމުގެ ދެމެދުގައި ބަދަލު ކުރެވުނު އެއްބަސްވުންތަކާއި މަޝްވަރާގެ ސަބަބުން ދެ ގައުމުގެ ގުޅުން އިތުރަށް ވަރުގަދަވާނެ ކަމަށް ރައީސް ވިދާޅުވިއެވެ. އެގޮތުން މިއަދުގެ ބައްދަލުކުރެއްވުމުގައި އެ ގުޅުންތައް ދެމެހެއްޓުމުގެ މުހިންމުކަމުގެ މައްޗަށް ރައީސް އަލިއަޅުއްވާލެއްވިއެވެ.

ރައީސް ވަނީ ލަންކާގެ ރައީސް ޑިސަނަޔަކަ އެގައުމުގެ އިގުތިސާދީ ހާލަތު ކުރިއެރުވުމަށް ކުރި މަސައްކަތްޕުޅަށް ތައުރީފު ކުރައްވާފައެވެ. ޑިސަނަޔަކަގެ ވެރިކަމުގެ ދަށުން ދެމެހެއްޓެނެވި އިގްތިސާދަކާ ދިމާއަށް ލަންކާއަށް ދަތުރުކުރެވޭނެ ކަމަށް އެމަނިކުފާނު ވިދާޅުވިއެވެ. އަދި ލަންކާ ސަރުކާރުގެ ފަރާތުން އެގައުމުގައި ދިރިއުޅޭ ދިވެރިންނަށް ފޯރުކޮށްދޭ ހިދުމަތްތަކަށް ރައީސް ވަނީ ޝުކުރު އަދާކުރައްވާފައެވެ.