މިފްކޯއިން މަސްވެރިންނަށް 1.4 މިލިއަން ރުފިޔާ ދޫކޮށްފިއެވެ.

މިފްކޯ އިން މިއަދު އާންމުކުރި ތަފާސްހިސާބުތައް ދައްކާ ގޮތުގައި އެކުންފުނިން މި އަދަދުގެ ފައިސާ ދޫކޮށްފައިވަނީ ހޯމަ ދުވަހުގައި 34 ދޯންޏަކުން ކިރުވި މަހަށެވެ. އެގޮތުން މިފްކޯއިން ވަނީ މަސްވެރިންނަށް ޖުމްލަ 1،475،754 ރުފިޔާ މިއަދު ދޫކޮށްފައެވެ.

މަސްވެރިންނަށް މި އަދަދު މިއަދު ދައްކާފައިވާއިރު އިއްޔެ އެކުންފުނިން ވަނީ 21 ދޯންޏަކަށް 1،140،979 ރުފިޔާ ދޫކޮށްފައެވެ. އެއީ އާދީއްތަ ދުވަހުގައި މި 21 ދޯނިން ކިރުވި މަަހަށް ދޫކުރި ފައިސާ ކަމަށް މިފްކޯއިން ޢާންމުކުރި ރިޕޯޓްގައިވެ އެވެ.

މަސްވެރިންނަށް 48 ގަޑިއިރުގެ ތެރޭގައި ފައިސާ ދޫކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވަޢުދުފުޅެކެވެ. އެގޮތުން ނިމިދިޔަ އަހަރުގެ މަސްވެރިންގެ ދުވަހުން ފަށައިގެން މިފްކޯ އިން އަންނަނީ މި ވަޢުދު ފުއްދުމަށްޓަކައި، މަސްވެރިން ކިރުވާ މަހަށް ބަރާބަރަށް ފައިސާ ދައްކަމުންނެވެ.

މަސްވެރިކަމުގެ ސިނާއަތް ކުރިއަރުވަން މިފްކޯގެ ކެޕޭސިޓީ އިތުރުކުރުމަށް ސަރުކާރުން ވަނީ ޚާއްސަ މަސައްކަތްތަކެއް ފަށާފައެވެ.