ވައިގަދަވެ މާލެއާއި ހުޅުމާލޭގައި ގަސްތައް ވެއްޓި ގެއްލުންތަކެއް ވެއްޖެއެވެ.
މިހާރު ކުރަމުންދާ ވިއްސާރައިގައި މާލެ އައި ހުޅުމާލެއަށް ވައިގަދަވެ ބައެއް ގަސްތައް ވެއްޓި ގެއްލުންތަކެއް ވެއްޖެއެވެ.
މި ވިއްސާރައިގައި ގާތްގަނޑަކަށް 52 މޭލަށް ވައިގަދަވެފައި ވާކަމަށް މޫސުމާ ބެހޭ ގައުމީ އިދާރާއިން ބުންޏެވެ.
ހުޅުމާލޭގެ އެކި ސަރަހައްދުތަކުން ގަސްތައް ވެއްޓުމުގެ ސަބަބުން މަގުމަތީގައި ޕާކުކޮށްފައި ހުރި އުޅަނދުތަކަށާއި ޖަހާފައިހުރި ފެންސުތަކަށް އެކިވަރުގެ ގެެއްލުންތައް ލިބިފައިވެއެވެ. އަދި ހުޅުމާލެ ދެވަނަ ފިޔަވަހީގައި ހުރި ބަސް ސްޓޭންޑެއްވެސް ވަޔާ އެއްލާލާފައިވެއެވެ.
މާލޭގެ ބައެއް ސަރަހައްދުތަކުގައި ގަސް ވެއްޓުމާއި، ފުރާޅު އެއްލާލުން ފަދަ ހާދިސާތައް ހިނގާފައިވެއެވެ. އެ ސަރަހައްދުތަކުގައި ފުލުހުންނާއި ގުޅުންހުރި އިދާރަތަކުން ވަނީ ހަރަކާތްތެރިވެފައެވެ.
މި ދުވަސްވަރު ކަނޑު ގަދަވާތީ އެމްއެންޑީއެފް ކޯސްޓްގާޑާއި މޫސުމާ ބެހޭ ގައުމީ އިދާރާގެ ލަފާގެ ދަށުން ނޫނީ އެއްވެސް ކަނޑު ދަތުރެއް ނުކުރަން މެޓް އޮފީހުން އިލްތިމާސްކުރެއެވެ.
ކިޔުންތެރިންގެ ހިޔާލު