ރެޑްސީ ހުރަސްކޮށް މުދާ ހިފައިގެން އިސްރާއީލަށް ދަތުރު ކުރަނިކޮށް ޔަމަނުގެ ހޫތީން އިހަށްދުވަހު ހަމަލާދިން އިނގިރޭސި މުދާ އުފުލާ ބޯޓުވެސް އަދިޔަށް ހިނގައްޖެއެވެ.
އެ ބޯޓަށް ހޯމަދުވަހާއި އަދި އަންގާރަ ދުވަހުވެސް ހޫތީ ކަނޑުގެ ލަޝްކަރުން ހަމަލާދިނެވެ.
ހޫތީން ހަމަލާ ދިނުމުގެ ސަބަބުން ބޮޑެތި ގެއްލުންތައް ލިބި، ކަނޑުމަތީގައި ދެދުވަސް ވަންދެން އޮތުމަށްފަހު އަޑިޔަށް ގޮސްފައިވަނީ “އިޓާރނިޓީ ސީ” ނަމަކަށްކިޔާ ބޯޓެވެ.
ހޫތީންގެ އިންޒާރުތަކަށް ބެލުމެއްނެތި އެ ބޯޓު ދަތުރު ކުރަމުންދިޔައީ އިސްރާއީލުގެ އީލާތަށެވެ. އެ ބޯޓަށް ހޫތީން ހަމަލާދިނީ އެމީހުން ތަކުރާރުކޮށް ދެމުންގެންދިޔަ އިންޒާރުތަކަށް ކިޔަމަން ނުވުމުންނެވެ.
ޚަބަރު ލިބޭގޮތުގައި، ބޯޓަށް ހަމަލާ ދިނުމުގެކުރިން ހޫތީންވަނީ، ބޯޓުގައި ތިބި 25 ކްރޫ މެމްބަރުން ބޯޓު ދޫކޮށް ދިއުމަށް ފުރުސަތު ދީފައެވެ. ނަމަވެސް، އެމީހުންވަނީ ބޯޓު ދޫކޮށް ފޭބުމަށް އިންކާރު ކޮށްފައެވެ.
މީޑިއާ ރިޕޯޓްތައް ބުނާގޮތުގައި، އަޑިޔަށް ދިޔަ ބޯޓުގެ ކްރޫއިންގެ ތެރެއިން 6 މީހަކު ކަނޑުމަތިން ވަނީ ސަލާމަތް ކޮށްފައެވެ. ދެން ތިބި މީހުންނަށް ވީގޮތެއް ނޭނގޭ ކަމަށް ބުނެއެވެ. ބައެއް ރިޕޯޓްތައް ބުނަނީ ހޫތީން އެމީހުން ހައްޔަރުކުރީ ކަމަށެވެ.
މިއީ، ރަތްކަނޑުގައި ހޫތީން ހަމަލާދީ، މި ހަފްތާގައި ފައްތާލި 2 ވަނަ ބޯޓެވެ.
މިދިޔަ އާދީއްތަ ދުވަހު ހޫތީން ހަމަލާދީ އަދި އޭގެ ދެދުވަސްފަހުން ފައްތާލީ “މެޖިކް ސީސް” ނަމަކަށްކިޔާ ބޯޓެވެ. އެއީވެސް އިސްރާއީލަށް މުދާ ހިފައިގެންދިޔަ ބޯޓެކެވެ.
ޒަޔަނިސްޓު އިސްރާއީލުން ފުރައިގެންދާ އަދި އިސްރާއީލަށް މުދާ ހިފައިގެންދާ ހުރިހާ ބޯޓުތަކަށް ހޫތީން ރަތްކަނޑު ބަންދުކުރީ، ޣައްޒާގައި ހިންގަމުންގެންދާ ނަސްލުނައްތާލުމުގެ ޖަރީމާތަކާ ގުޅިގެންނެވެ.
މި ހަފްތާގައި ދެ ބޯޓަކަށް ހަމަލާދީ ފައްތާލުމަށްފަހު ހޫތީންގެ އަސްކަރިއްޔާ އަންސާރުﷲ އިން ނެރުނު ބަޔާނުގައި ބުނެފައިވަނީ، ޒަޔަނިސްޓު ވަގުތީ ދައުލަތުން ޣައްޒާގައި ހިންގާ ނަސްލު ނެތިކޮށްލުމުގެ ޖަރީމާތަކަށް އެހީވުމަށް އަންނަ ކޮންމެ ބޯޓެއް ފައްތާލާނޭ ކަމަށެވެ.
ކިޔުންތެރިންގެ ހިޔާލު