އެޑިޔުކޭޝަން މިނިސްޓަރު ޑރ. އިސްމާޢީލް ޝަފީޢު، މާލޭގެ ތިން ސްކޫލެއްގެ މުދައްރިސުންނާއެކު ބައްދަލުކުރައްވައި، މުދައްރިސުންނަށް ދިމާވާ ދަތިތަކާ ގުޅޭގޮތުން މަޝްވަރާކުރައްވައިފިއެވެ.
އެޑިޔުކޭޝަން މިނިސްޓްރީން މިއަދު ކުރި ޕޯސްޓެއްގައިވާ ގޮތުން، މި ބައްދަލުވުމުގައި ބައިވެރިވެފައިވަނީ އަމީނިއްޔާ ސްކޫލާއި، އިސްކަންދަރު ސްކޫލް އަދި ސީއެޗްއެސްއީގެ މުދައްރިސުންނެވެ. މި ބައްދަލުވުމުގައި މިނިސްޓްރީން ކުރިއަށްގެންދާ މުހިންމު މަސައްކަތްތަކާ ބެހޭ މައުލޫމާތު މުދައްރިސުންނާ ހިއްސާކޮށްފައިވެއެވެ.
މިދިޔަ ބުރާސްފަތި ދުވަހު ބޭއްވި މި ބައްދަލުވުމުގެ މައިގަނޑު މަޤްސަދަކީ މުދައްރިސުންނަށް ދިމާވާ ދަތިތައް ދެނެގަނެ، އެ ކަންކަން ޕޮލިސީ ފެންވަރުގައި ހައްލުކުރުމަށް ކުރެވިދާނެ ކަންކަމާމެދު މަޝްވަރާކުރުންކަމަށް މިނިސްޓްރީން ބުނެފައިވެއެވެ.
އެޑިޔުކޭޝަން މިނިސްޓްރީން ފާހަގަކުރާ ގޮތުގައި މި ބައްދަލުވުމުގައި މުދައްރިސުންގެ ފަރާތުން ވަރަށް މުހިންމު ޚިޔާލުތަކާއި ހުށަހެޅުންތައް ލިބިފައިވެއެވެ. އަދި މި ހުށަހެޅުންތަކަށް ރިއާޔަތްކޮށް، ކުރިއަށް އޮތް ތަނުގައި މުދައްރިސުންނަށް ދިމާވާ ދަތިތައް ހައްލުކުރުމަށް މިނިސްޓްރީން މަސައްކަތްކުރާނެ ކަމަށް ބުނެފައިވެއެވެ.
ކިޔުންތެރިންގެ ހިޔާލު