ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ނިމިދިޔަ މޭ މަހު ބޭސްފަރުވާގެ ހަރަދުގެ ގޮތުގައި 14 މިލިއަނަށްވުރެ ގިނަ ރުފިޔާ ހަރަދުކޮށްފިއެވެ.
މިކަން ހާމަކޮށްފައިވަނީ އެންސްޕާއިން އާންމުކޮށްފައިވާ މޭ މަހުގެ ބޭސްފަރުވާގެ ޕްރޮގްރާމްގެ ހަރަދުތަކުގެ ތަފްސީލުންނެވެ.
އެންސްޕާއިން ހާމަކޮށްފައިވާ މައުލޫމާތުގައިވާ ގޮތުން، ރާއްޖެއިން ބޭރުން ފަރުވާ ހޯދުމަށް 3،909،573.95 ރުފިޔާ ހަރަދުކޮށްފައިވާއިރު، ރާއްޖޭގައި ފަރުވާ ހޯދުމަށް 10،327،236.56 ރުފިޔާ ހަރަދުކޮށްފައިވެއެވެ.
މިއާއެކު މޭ މަހު ބޭސްފަރުވާގެ ހަރަދުގެ ގޮތުގައި ޖުމްލަ 14،236،810.51 ރުފިޔާ ހަރަދުކޮށްފައިވާ ކަމަށް އެންސްޕާއިން ވަނީ ހާމަކޮށްފައެވެ.
އެންސްޕާއަކީ 27 އޯގަސްޓް 2008 ގައި ވުޖޫދަށް އައި މުއައްސަސާއެކެވެ. މި މުއައްސަސާގެ މައިގަނޑު މަސްއޫލިއްޔަތުތަކުގެ ތެރޭގައި ޤައުމީ އިޖްތިމާއީ ސިއްހީ އިންޝުއަރަންސް ސްކީމު ހިންގާ ބެލެހެއްޓުމާއި އިޖްތިމާއީ ރައްކާތެރިކަމުގެ ޤާނޫނުގެ ދަށުން ކަނޑައެޅިފައިވާ ޕްރޮގްރާމްތައް ރާވާ ހިންގުން ހިމެނެއެވެ.
އެންސްޕާއިން ކުރިއަށްގެންދާ އެހީގެ ޕްރޮގްރާމްތަކުގެ ތެރޭގައި ބޭސްފަރުވާގެ އެހީގެ ޕްރޮގްރާމްގެ އިތުރުން، ނުކުޅެދުންތެރިކަން ހުންނަ ފަރާތްތަކަށް ދެވޭ މާލީ އެހީގެ ޕްރޮގްރާމާއި، އެކަނިވެރި މައިން/ބަފައިންނަށް ދެވޭ މާލީ އެހީގެ ޕްރޮގްރާމް، އަދި ފަގީރު ހާލަތުގައި ދިރިއުޅޭ ފަރާތްތަކަށް ކާބޯތަކެތި ގަތުމަށް ދެވޭ މާލީ އެހީގެ ޕްރޮގްރާމްފަދަ އެކި ބާވަތުގެ އެހީގެ ޕްރޮގްރާމްތައް ހިމެނެއެވެ.
ކިޔުންތެރިންގެ ހިޔާލު