ގއ. ކޮލަމާފުއްޓަށް މަސްތުވާތަކެތި އެތެރެކުރި މީހަކު ފުލުހުން ހައްޔަރުކޮށްފިއެވެ.
އެ މައްސަލާގައި ހައްޔަރުކޮށްފައި ވަނީ ގއ. ކޮލަމާފުށި، ދޮންވެލި، ޝިފާއުﷲ ސައީދު44، އެވެ.
ފުލުހުންގެ މިޑިއާ އޮފިޝަލް ވިދާޅުވީ ކޮލަމާފުއްޓަށް މަސްތުވާތަކެތި އެތެރެކުރަން އުޅޭ ކަމަށް ލިބުނު މައުލޫމާތަކާ ގުޅިގެން މިދިޔަ ބުދަ ދުވަހު އެ ރަށު ޕޮލިސް ސްޓޭޝަނުން ހިންގި އޮޕަރޭޝަނެއްގައި ޝިފާއުﷲ ހައްޔަރުކުރީ އާރްޓީއެލް ފެރީން އެ ރަށަށް މަސްތުވާތަކެތި ގެންދިޔުމުން ކަމަށެވެ.
އާރްޓީއެލް ފެރީން ކޮލަމާފުއްޓަށް އައުމުން އޭނާ ބަލައި ފާސްކުރިއިރު، އޭނާގެ ގެނައި ފޮށިގަނޑެއްގެ ތެރެއިން މަސްތުވާތަކެތި ކަމަށް ބެލެވޭ އެއްޗެއް ހުރި ޕެކެޓެއް ފެނިފައިވާ ކަމަށް އޮފިޝަލް ވިދާޅުވިއެވެ.
ފުލުހުން ބުނީ އެ އޮޕަރޭޝަންގައި ޝިފާއުﷲ ހުއްޓުވަން އުޅުމުން މަޑުނުކޮށް ސައިކަލަށް އަރައިގެން ދާން އުޅުމުގެ ތެރޭގައި ވެއްޓި ކަނާތު ކަކުލާއި އުޅަނބޮށި މަށައިގެން ގޮސްފައިވާ ކަމަށެވެ.
އޭނާ މިހާރު ހުރީ ކޯޓު އަމުރެއްގެ ދަށުން 11 ދުވަހަށް ބަންދުކޮށްފައެވެ.
ކިޔުންތެރިންގެ ހިޔާލު