ރާއްޖެ އެތެރެކުރަން އުޅުނު 18 ކިލޯގެ މަސްތުވާތަކެތި އަތުލަައިގެންފި އެވެ.
މި ތަކެތި އަތުލައިގަތީ މޯލްޑިވްސް ކަސްޓަމްއަށް ލިބުނު އިންޓެލިޖެންސް މަޢުލޫމާތަކާއި ގުޅިގެން މިރޭ ހިންގި ޚާއްސަ އޮޕަރޭޝަނެއްގަ އެވެ.
ހޯމް ލޭންޑް އެންޑް ސެކިއުރިޓީ މިނިސްޓަރު އަލީ އިޙްސާން މިރޭ ވިދާޅުވީ ކަސްޓަމްސް އިން މިރޭ ހިންގި ޚާއްސަ އޮޕަރޭޝަނެއްގައި 18 ކިލޯގްރާމްގެ މަސްތުވާތަކެތި ރާއްޖެ އެތެރެކުރަން އުޅެނިކޮށް އަތުލައިގަނެފައިވާ ކަމަށެވެ.
މިތަކެތީގެ މަގުމަތީގެ އަގަކީ ގާތްގަނޑަކަށް 26 މިލިއަން ދިވެހި ރުފިޔާ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަށް ކުރެވޭ މަސައްކަތްތަކުގެ ތެރެއިން ރައީސުލްޖުމްހޫރިއްޔާގެ ޚާއްސަ އިރުޝާދުތަކާއި އެއްގޮތަށް ރާއްޖޭގެ ބޯޑަރު ފުރިހަމަޔަށް ބެލެހެޓުމަށް ކަސްޓަމްސްގެ މުވައްޒަފުން ކުރައްވާ އަގުހުރި ބުރަ މަސައްކަތަށް ޝުކުރުދަންނަވާ ކަމަށެވެ.
އަދި ވިދާޅުވީ މަސްތުވާތަކެތީގެ ވިޔަފާރިކުރާފަރާތްތަކަށް ފަހިކޮށް އޮތް މާހައުލު ނައްތާލައި އެފަރާތްތަކާ ޤާނޫނު ދަނީ އަރާހަމަކުރަމުން ކަމަށެވެ.
ކަސްޓަމްސް އިން ބުނީ މަސްތުވާތަކެތި އެތެރެ ކުރީ ބެންގަލޫރު މަގުން ރާއްޖެއައި ފްލައިޓެއްގައި ކަމަށެވެ. އެ ތަކެތި ހުރީ ޕްލާސްޓިކް ގަސްޕޮޓްތަކެއްގައި ފޮރުވާފަ އެވެ.
ކިޔުންތެރިންގެ ހިޔާލު