އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައާ ގުޅޭގޮތުން ޖަރުމަނުގެ ޗާންސެލަރ ފްރީޑްރިކް މާރޒް ދެއްކެވި ވާހަކަތައް ވަރަށް ސީރިއަސްކޮށް ނަގާނެ ކަމަށް އިސްރާއީލުން ބުނެފިއެވެ.
ޖަރުމަނުގައި ހުންނަ އިސްރާއީލު އެމްބަސެޑަރ ރޮން ޕްރޮސޮރް ބުނީ، އެއީ، އިސްރާއީލު ސަރުކާރުން ވަރަށް ސީރިއަސްކޮށް ނަގާނެ ވާހަކަތަކެއް ކަމަށެވެ.
ޖަރުމަނު ޗާންސެލަރުގެ ވާހަކަތައް އިސްރާއީލުން ސީރިއަސްކޮށް ނަގަނީ، އޭނާއަކީ އިސްރާއީލުގެ ގާތް ރަހްމަތްތެރިޔަކަށް ވާތީ ކަމަށްވެސް އިސްރާއީލު އެމްބަސެޑަރު ބުނެފައި ވެއެވެ.
ޖަރުމަނުގެ ޗާންސެލަރ ފްރީޑްރިކް މާރޒް ވިދާޅުވީ، އިސްރާއީލުން ޣައްޒާއަށް މިހާރު ހަމަލާތައް ދެމުންގެންދާ ލެވެލްއާއި، މިންވަރަށް ބަލާއިރު، މިއީ، ހަމާސްއާ ދެކޮޅަށް ކުރާ ހަނގުރާމައެއް ކަމަށް މިހާރު ނުލެބެވޭ ކަމަށެވެ.
ޗާންސެލަރ ފްރީޑްރިކް މާރޒް ވިދާޅުވީ، އިސްރާއީލުން ދެމުންގެންދާ ހަމަލާތަކުގައި ގިނައިން މަރުވަމުންދަނީ އާންމުން ކަމަށެވެ.
ޗާންސެލަރ ވިދާޅުވީ، ޣައްޒާގައި އިސްރާއީލު ސިފައިން ހާސިލްކުރަން އުޅޭ ކަމެއް ސާފު ނުވާ ކަމަށެވެ.
ޣައްޒާއާ ދެކޮޅަށް ހަނގުރާމަ ކުރުމަށް ބޭނުންވާ ހަތިޔާރުގެ 99 އިންސައްތަ ފޯރުކޮށްދެނީ އެމެރިކާއާއި ޖަރުމަނުންނެވެ.
ޗާންސެލަރ ވިދާޅުވީ، އިސްރާއީލުގެ އެންމެ ގާތް ބައިވެރިޔާގެގޮތުގައި ޖަރުމަނު އަބަދުވެސް އޮންނާނޭ ކަމަށާއި، އެހެން ނަމަވެސް، ބައިނަލްއަގްވާމީ އިންސާނީ ހައްގުތަކުގެ ގާނޫނާ ޚިލާފްވެ، އިންތަކުން ބޭރުވާއިރު، ކިތަންމެ ގާތް ބައިވެރިޔަކަސް، ބަސްބުނަންޖެހޭ ހާލަތު އަތުވެދާނެ ކަމަށް އިސްރާއީލުވެސް ދަންނަން ޖެހޭނޭ ކަމަށެވެ.
