ސިންގަޕޫރުން ދިވެހިރާއްޖެއަަށް ކަނޑައަަޅާފައި ހުންނަވާ ނޮން ރެޒިޑެންޓް ސަފީރު ސޫ ކޮކް ލެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައިފިއެވެ.

ރައީސް އޮފީހުގައި ސަފީރު ސޫ ކޮކް ލެންއާ ރައީސް ބައްދަލުކުރެއްވީ މިއަދު ހެނދުނެވެ. މި ބައްދަލުވުމުގައި ދެ ގައުމުގެ މެދުގައި އޮތް ގުޅުން އިތުރަށް ބަދަހިކުރުމާ ގުޅޭ ގޮތުން ސަފީރާއި ރައީސް މަޝްވަރާކުރެއްވިއެވެ. އެގޮތުން މަތީ ތައުލީމުގެ ދާއިރާއާއި ސިއްހީ ދާއިރާގެ އިތުރުން ފަތުރުވެރިކަމުގެ ދާއިރާއިން ގުޅުން ބަދަހިކުރުމާމެދު ދެ ބޭފުޅުން މަޝްވަރާކުރެއްވިއެވެ.

އޭގެ އިތުރަށްވެސް އައު ދާއިރާތަކުން ދެ ގައުމުގެ މެދުގައި އެކީ މަސައްކަތްކުރުން އިތުރުކުރުމާމެދު މި ބައްދަލުވުމުގައި މަޝްވަރާކުރައްވާފަައިވެއެވެ.

އަދި ރާއްޖޭގެ ވިޔަފާރިއާއި އިގުތިސާދާއި ގެދޮރުވެރިކަމުގެ ދާއިރާގައި ސިންގަޕޫރުގެ ވިޔަފާރިތަކުން އިންވެސްޓުކުރުމަށް ހިތްވަރުދެއްވުމުގެ ޝައުގުވެރިކަންް ރަައީސްވަނީ ފާޅުކުރައްވާފައެވެ. ހާއްސަކޮށް ގެދޮރުވެރިކަމުގެ ދާއިރާއން ފަންނީ އެހީތެރިކަން ރާއްޖެއަށް ބޭނުންވާކަން އެމަނިކުފާނު ފާހަގަކުރެއްވިއެވެ.

އަދި އިއާދަކުރަނަވި ހަކަތައިން ކަރަންޓު ދޭ ތިމާވެއްޓާ ރަހުމަތްތެރި ސިޓީއެއް ބިިނާކުރެއްވުމަށް ގެންގުޅުއްވާ ވިސްނުންފުޅު ސިންގަޕޫރު ސަަފީރާ ރައީސް ހިއްސާކުރެއްވިއެވެ.

ރައީސާއި ސަފީރުގެ ބައްދަލުވުން ނިންމަވައިލެއްވީ ދެ ގައުމުގެ މެދުގައި އޮތް ޑިޕްލޮމެޓިކް ގުޅުން އިތުރަށް ބަދަހިކުރެއްވުމަށް އިލްތިޒާމުވެވަޑައިގަތުމާއެކު، ދެ ގައުމުގެ މަސްލަހަތު އެކުލެވޭ ކަންކަމުގައި އިސްތިރާޖީ ގޮތުން އެއްބާރުލުން ދިނުން އިތުރުކުރުމަށް އެއްބަސްވެވަޑައިގަންނަވަމުންނެވެ.