ބަންކަރިންގެ ހިދުމަތުން އެސްޓީއޯއަށް 124 މިލިއަން ރުފިޔާގެ އާމްދަނީއެއް ލިބިފައިވާ ކަމަށް އެ ކުންފުނީގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވެއްޖެއެވެ.
ނަސަންދުރާ ހޮޓަލުގައި މިރޭ ބޭއްވި އެސްޓީއޯގެ އަހަރީ އާންމު ޖަލްސާގައި ވާހަކަދައްކަވަމުން ޝިމާދު ވިދާޅުވީ މިދިޔަ ސެޕްޓެމްބަރު މަހު ފެށި ބަންކަރިންގެ ހިދުމަތްތައް މާލެ ސަރަހައްދުގައި ވަރަށް ރަނގަޅު ކަމަށާއި ބޮޑެތި ޝިޕިން ލައިނާތަކުގެ އިތުބާރު ލިބިފައިވާ ކަމަށެވެ.
ބަންކަރިންގައި އަދިވެސް ރަނގަޅު ކުރަންޖެހޭ ކަންތައްތަކެއް އެބަހުރި ކަމަށާއި އަވަށްޓެރި ގައުމުތަކާ އެ ހިދުމަތުގައި ވާދަކުރުމަށް ކަމާބެހޭ ފަރާތްތަކާ މަޝްވަރާކޮށް މަސައްކަތްކުރަމުން އަންނަ ކަމަށް ވިދާޅުވިއެވެ.
ޝިމާދު ވިދާޅުވީ ދުނިޔޭގެ އެންމެ ބޮޑު އެއް ޝިޕިން ލައިނާގެ ކްރޫސްލައިނާއަކަށް ހިދުމަތްދެވިފައިވާ ކަމަށާއި މިހާތަނަށް އެ ހިދުމަތުން އެސްޓީއޯއަށް 124 މިލިއަން ރުފިޔާގެ އާމްދަނީއެއް ލިބިފައިވާ ކަމަށެވެ. އަދި އެ ހިދުމަތުގެ ކާމިޔާބު އޭނާ ފާހަގަކުރެއްވިއެވެ.
ހަކަތައިގެ ވިޔަފާރިކުރާ ދުނިޔޭގެ އެންމެ ބޮޑު ކުންފުނި، ވިޓޯލްއާ ގުޅިގެން އޯފްޝޯ ހިދުމަތެއްގެ ގޮތުގައި ބަންކަރިންގެ ހިދުމަތް ފެށީ އިހަވަންދިއްޕޮޅުގައެވެ. އެ ހިދުމަތަށް އެސްޓީއޯ އިން ދެ ބޯޓެއް ބޭނުންކުރެއެވެ.
ކިޔުންތެރިންގެ ހިޔާލު