ހާއްސަ އެހީއަށް ބޭނުންވާ ކުދިންނާއި އެހެނިހެން ކުދިން ވެސް އެޑިޔުކޭޝަން މިނިސްޓްރީން ބާކީ ނުކުރާނެ ކަމަށް އެޑިޔުކޭޝަން މިނިސްޓަރު އިސްމާއިލް ޝަފީއު ވިދާޅުވެއްޖެއެވެ.
”އަހާ“ ފޯރަމްގައި މީހަކު ކުރި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ މިހާރުވެސް 600 އެއްހާ ޓީޗަރުން ބޭނުންވާ ކަމަށާއި، އޭގެ ތެރޭގައި ހާއްސަ އެހީއަށް ބޭނުންވާ ކުދިންނަށް ކިޔަވައިދީ ހިދުމަތް ދިނުމަށް ބޭނުންވާ ޓީޗަރުން ވެސް ހިމެނޭ ކަމަށެވެ.
މިނިސްޓަރު ވިދާޅުވީ ޓީޗަރުން ތަމްރީނު ކުރުމަށްޓަކައި ވިލާ ކޮލެޖާއި އެހެނިހެން ކޮލެޖުތަކާ އެކު ވާހަކަދައްކައި، ވަރަށް ބޮޑު މަސައްކަތްތަކެއް ކުރެވިފައިވާ ކަމަށެވެ.
”ވަރަށް ޔަގީންކަމާ އެކު ދަންނަވާލަން ބޭނުންވަނީ މިނިސްޓްރީ އޮފް އެޑިޔުކޭޝަނަކުން އެއްވެސް ކުއްޖަކު ބާކީއެއް ނުކުރާނެ“ ކަމަށް މިނިސްޓަރު ވިދާޅުވިއެވެ.
އެޑިއުކޭޝަން މިނިސްޓްރީގައި ވަސީލަތްތައް ހުރި މިންވަރަކުންނާއި ފަންނީ ގާބިލުކަން ހުރި މިންވަރަކުން އެއްވެސް ކުއްޖަކު ބާކީ ނުކޮށް ޚިދުމަތްތައް ދެމުން އަންނަ ކަމަށެވެ.
މީގެއިތުރުން މިނިސްޓަރު ވިދާޅުވީ ތުއްތު ކުދިންނަށް ކިޔަވައިދޭ އަމިއްލަ ތަންތަނަށް ވެސް އެ މިނިސްޓްރީން އެހީތެރިކަން ފޯރުކޮށްދެމުން އަންނަ ކަމަށެވެ.
