ދިވެހި އުފެއްދުންތެރިކެރިކަމުގެ ޤައުމީ މައުރަޒު 25 ގެ މުބާރާތުގެ ބައިގައި ބައިވެރިވުމަށް ހުށަހަޅާ ތަކެތި ބަލައިގަތުން ފަށައިފިއެވެ.

އިޤްތިޞާދީ ވުޒާރާއާއި ބިޒްނަސް ސެންޓަރ ކޯޕަރޭޝަން ގުޅިގެން މި މަހުގެ 23 އިން 31 އަށް ހުޅުމާލޭ ސެންޓްރަލް ޕާކުގައި ބޭއްވުމަށް ހަމަޖެހިފައިވާ މި މައުރަޒަކީ، ދިވެހި އުފެއްދުންތެރިންނާއި ހުނަރުވެރިންގެ ޤާބިލުކަން ދެއްކުމަށް ރާއްޖޭގައި މިހާތަނަށް ބޭއްވޭ އެންމެ ބޮޑު އެއް މައުރަޒެވެ.

އިޤްތިޞާދީ ވުޒާރާގެ ސީނިއަރ ޕޮލިސީ އޮފިސަރ މުޞްޠަފާ ޢަބްދުލްޣަފޫރު ވިދާޅުވީ، މައިގަނޑު 15 ދާއިރާއަކުން 83 ސަބް ކެޓަގަރީއަކަށް ތަކެތި ހުށަހެޅުމުގެ ފުރުޞަތު ހުޅުވާލާފައިވާ ކަމަށެވެ. އޭގެ ތެރެއިން މަސްވެރިކަމާއި ދަނޑުވެރިކަމުގެ އުފެއްދުންތައް ބަލައިގަތުމަށް ހަމަޖެހިފައިވަނީ މި މަހުގެ 10 އިން 13 އަށް އަދި 14 އިން 15 އަށް ކަމަށާއި، ޓެކްނޮލޮޖީ އުފެއްދުންތަކާއި ކާބޯތަކެތީގެ އުފެއްދުންތައް ބަލައިގަތުމަށް ހަމަޖެހިފައިވަނީ މި މަހުގެ 15 އިން 17 އަށް ކަމަށެވެ.

މުޞްޠަފާ އިތުރަށް ވިދާޅުވީ، ތަކެތި ބަލައިގަންނަމުން ދާނީ ހުޅުމާލޭ ސެންޓްރަލް ޕާކުގައި ޤާއިމުކޮށްފައިވާ ބޮޑު ޓެންޓުން ކަމަށެވެ.