މޫސުމާބެހޭ ޤައުމީ މަރުކަޒުން އަންގަވާފައިވާ ގޮތުގައި، ކުރިއަށް އޮތް 24 ގަޑިއިރުގެ ތެރޭގައި ދިވެހިރާއްޖޭގެ އެކި ސަރަޙައްދުތަކަށް ވިއްސާރަވެރި މޫސުމެއް ކުރިމަތިވުމަކީ އެކަށީގެންވާ ކަމެކެވެ.
މަރުކަޒުގެ ބަޔާނުގައި ފާހަގަކޮށްފައިވާ ގޮތުގައި، ރާއްޖޭގެ އެކި ކަންކޮޅުތަކުގައި ގުގުރުމާއެކު ވާރޭވެހުމުގެ ފުރުޞަތު އޮތްއިރު، ޚާއްޞަކޮށް މެދުރާއްޖެތެރެއާއި ދެކުނުގެ ބައެއް ރަށްރަށަށް ބޯކޮށް ވާރޭވެހުމުގެ ފުރުޞަތު ބޮޑެވެ. މި މޫސުމާ ގުޅިގެން މަރުކަޒުން ވަނީ ރައްކާތެރިކަމުގެ އިންޒާރުތައް ދޫކުރަން ފަށާފައެވެ.
އިތުރަށް މަރުކަޒުން މަޢުލޫމާތު ދެއްވާފައިވާ ގޮތުގައި، ހުޅަނގާއި ހުޅަނގު އުތުރުން ގަޑިއަކު 10 އާއި 20 މޭލުގެ ބާރުމިނުގައި ވައިޖެހުމަކީ އެކަށީގެންވާ ކަމެކެވެ. އަދި ވިއްސާރަވެރި ވިލާގަނޑުތަކުގައި ވައިގެ ބާރުމިން ގަޑިއަކު 30 މޭލަށް އިތުރުވުމަކީވެސް އެކަށީގެންވާ ކަމެކެވެ. މީގެ އިތުރުން، ކަނޑުތައް އާދަޔާ ޚިލާފަށް ގަދަވެ، ވިއްސާރަވެރި ވިލާގަނޑުތަކުގައި އިތުރަށް ގަދަވުމުގެ ފުރުޞަތު އޮތްކަމަށާއި، ރާޅުގެ އުސްމިން 3 ފޫޓާއި 6 ފޫޓާ ދެމެދުގައި ހުރުމަކީ އެކަށީގެންވާ ކަމެއްކަމަށް މަރުކަޒުން ވަނީ އަންގަވާފައެވެ.
މޫސުމާބެހޭ ޤައުމީ މަރުކަޒުން އިތުރަށް ފާހަގަކުރައްވާފައިވާ ގޮތުގައި، މިހާރު ރާއްޖެއަށް ކުރިމަތިވެފައިވާ މި ވިއްސާރައަކީ ދެ މޫސުން ބަދަލުވާ ދުވަސްވަރު އާންމުކޮށް ކުރިމަތިވާ ބާވަތުގެ ވިއްސާރައެކެވެ.
