މިއީ ވެމްކޯއިން މުބާރާތް ކާމިޔާބުކުރި ހަތަރު ވަނަ ފަހަރެވެ. މިދިޔަ އަހަރު ވެމްކޯއިން ލީގާއި ވީއޭއެމް ކަޕް ކާމިޔާބުކުރި ނަމަވެސް، އެޓީމަށް ވަނީ ގައުމީ މުބާރާތް ގެއްލިފައެވެ. އެފަހަރު ގައުމީ މުބާރާތް ވާދަވެރި ޕޮލިސް ނެގި އިރު، މިފަހަރު ޕޮލިހުން އަތުލީ ލީގެވެ. އަނެއް ދެ މުބާރާތް ނެގީ ވެމްކޯއިންނެވެ.

ޒުވާނުންގެ މަރުކަޒު އެތެރޭ ކޯޓުގައި ރޭ ކުޅުނު ފައިނަލް މެޗު ވެމްކޯއިން ކާމިޔާބުކުރީ ފަސް ސެޓަށް ކުޅެ، 3-2 ސެޓުންނެވެ.

ޕޮލިހަށް އަނިޔާގެ މައްސަލަތަކާ ކުރިމަތިވެފައިވާ އިރު، ރޭގެ މެޗަށްވެސް އެޓީމުން ނުކުތީ މުހިއްމު ކުޅުންތެރިޔާ، ގައުމީ ޓީމުގެ ކެޕްޓަން ހައްވާ ރާޝިދާ (ހައްވަ) ނުލައެވެ. އެތަން ޓީމަށް ދެއްކި އިރު، ބޮޑަށް އެޓީމުގެ ފަރާތުން ފެނުނީ ވަރުބަލިކަމެވެ. ދެޓީމުގެ ތަފާތަކަށްވެސް ބޮޑަށް ފެނުނީ ފަސްވަނަ ސެޓުގެ ފޯރިއެވެ.

ފުރަތަމަ ސެޓު ޕޮލިހުން 25-23 އިން ގެންގޮސްފައިވާ އިރު، ވެމްކޯއިން ވަނީ ދެވަނަ ސެޓު 25-22 އިން ގެންގޮސްފައެވެ. ތިންވަނަ ސެޓުވެސް ވެމްކޯއިން ރަނގަޅަށް ފަށައި ލީޑުގައި ކުޅެމުން ދިޔަ ނަމަވެސް، ޕޮލިހުން ވަނީ ހިތްވަރާއެކު ސެޓު އަނބުރާލައި، 25-23 އިން ސެޓު ގެންގޮސްފައެވެ.

ހަތަރު ވަނަ ސެޓަށް ނުކުތް އިރު ވެމްކޯއަށް ޕްރެޝަރު ބޮޑުވެފައި އޮތް ނަމަވެސް، އެޓީމުގައި ތިބި ތަޖުރިބާކާރު ކުޅުންތެރިންނާއެކު 25-18 އިން ސެޓު ގެންގޮސް، ފަސްވަނަ ސެޓުގައި ތަފާތު ދެއްކިއެވެ. ފަސްވަނަ ސެޓުގައި ވެމްކޯ މާ ބޮޑަށްވެސް ޖޯޝާއެކު ކުޅުނު އިރު، އެޓީމުން އެ ސެޓު ގެންދިޔައީ 15-08 އިންނެވެ.

ގައުމީ މުބާރާތުގެ އެންމެ މޮޅު ތިން ކުޅުންތެރިންނަކީ ވެމްކޯގެ ސެޓަރު، ފާތިމަތު ޖޫޒާން ޒަރީރާއި އައިޝަތު މާޖިދާގެ އިތުރުން ޕޮލިހުގެ އައިމިނަތު އަރީޝާއެވެ.

މުބާރާތުގެ އެންމެ މޮޅު ބިދޭސީ ކުޅުންތެރިންނަކީ ވެމްކޯގެ ޕަޓިއްޔާ، ޕޮލިހުގެ ގްރަޒިއޭލާ އަދި ހުރާ ކޮމިއުނިޓީ ކްލަބުގެ ވެރޯނިކާއެވެ. ހުރައަކީ މުބާރާތުގެ ތިންވަނަ ޓީމެވެ.

އެންމެ އުންމީދީ ކުޅުންތެރިޔަކީވެސް ހުރާގެ އައިޝަތު ނަސްމާ އަހުމަދެވެ. އެންމެ މޮޅު ކޯޗަކަށް ހޮވުނީ ވެމްކޯގެ އަހުމަދު އަދީލް (ބޭބެ) އެވެ.

ރޭގެ ފައިނަލް މެޗު ޝަރަފުވެރިކޮށްދެއްވާފައި ވަނީ ރާއްޖޭގެ ނައިބު ރައީސް އަލް އުސްތާޒު ހުސައިން މުހައްމަދު ލަތީފެވެ.