އީރާނުގެ އެންމެބޮޑު ކޮމާޝަލް ޕޯޓް ކަމަށްވާ ޝާހިދު ރަޖާއީ ޕޯޓްގައި ރޯވި އަލިފާންގަނޑު، ގާތްގަނޑަކަށް އެއްކޮށް ކޮންޓްރޯލް ކޮށްފިއެވެ. ބާރުގަދަ ގޮވުމަކާއެކު ޝާހިދު ރަޖާއީ ޕޯޓްގައި އަލިފާން ރޯވެފައިވަނީ މިދިޔަ ހޮނިހިރު ދުވަހުއެވެ.
އަލިފާން ނިއްވުމުގެ މަސައްކަތުގައި އެތައްހާސް ފަޔަރފައިޓަރުންނާއި، ވެހިކަލްތަކާއި، ހެލިކޮޕްޓަރުތައްވެސް ބޭނުން ކުރެއެވެ.
މިކަމުގައި ރަޝިޔާއާއި، އެހެން ގައުމުތަކުގެ އެހީތެރިކަންވެސް އީރާނަށް ދެމުން ގެންދެއެވެ. އީރާނުގެ ކަމާބެހޭ އިދާރާތަކުން ބުނަނީ، އަލިފާނުގެ ސަބަބުން ޝާހިދު ރަޖާއީ ޕޯޓަށް ލިބިފައިވާ ގެއްލުންތައް ދެނެގަނެވޭނީ އަލިފާން އެއްކޮށް ނިއްވާލެވި އެ ސަރަހައްދަށް ވަދެވޭގޮތް ވުމުން ކަމަށެވެ.ޝާހިދު ރަޖާއީ ޕޯޓުގައި ހިނގި ވަރުގަދަ އަލިފާނުގެ ހާދިސާގައި 70 މީހުން މަރުވެ، ހާހަކަށްވުރެ ގިނަމީހުންނަށް އަނިޔާވިއެވެ.
ޕޯޓްގައި އަލިފާން ރޯވީ ކީއްވެގެންކަން އަދި ވަނީ ނޭނގިފައެވެ. ޝާހިދު ރަޖާއީ ޕޯޓުގެ ކަސްޓަމްސް އޮފީހުން ބުނެފައިވަނީ، އަލިފާން ރޯވީ ސީދާ ކީއްވެގެންކަން އަދި ބުނަން ނޭނގޭ ކަމަށާއި، ނަމަވެސް ބާރުގަދަ ގޮވުމަކީ ޕޯޓުގައި ރައްކާކޮށްފައި ހުރި ކެމިކަލް ސާމާނުގައި އަލިފާން ރޯވެގެން ގޮވި ގޮވުމެއް ކަމަށް ލަފާކުރެވޭ ކަމަށެވެ.
އީރާނުގެ ކަމާބެހޭ ފަރާތްތަކުން މިހާތަނަށް ބުނަމުން ގެންދަނީ މިއީ އެކްސިޑެންޓެއް ކަމަށް ބެލެވޭ ކަމަށެވެ. އެކަމަކު، މިއީ އީރާނުގެ ދުޝްމަން އިސްރާއީލުގެ އަމަލެއްކަމުގެ ތުހުމަތުވެސް އީރާނުގައި ކުރެއެވެ. މީގެކުރިން އީރާނަށް ދީފައިވާ މިފަދަ އެތައް ހަމަލާއެއްގެ ފަހަތުގައި އޮތީ ޒަޔަނިސްޓު އިސްރާއީލު ކަމަށް އީރާނުން ބުނެއެވެ.
ޝާހިދު ރަޖާއީ ޕޯޓުގައި ހިނގި ވަރުގަދަ އަލިފާނުގެ ހާދިސާއާ ގުޅިގެން އީރާނުގައި ގައުމީ ހިތާމައިގެ ތިންދުވަސް ވަނީ އިއުލާންކޮށްފައެވެ. އަލިފާނުގެ ހާދިސާއާ ގުޅިގެން، ޕޯޓު އޮންނަ ބަންދަރު އައްބާސްގެ ހުރިހާ އޮފީސްތަކާއި ސްކޫލްތައް ވަނީ ބަންދުކޮށްފައެވެ.
