ފުލުހުންނަކީ އަނިޔާވެރި ވާނެ ބައެއް ނޫން ކަމަށް ޕޮލިސް ކޮމިޝަނަރު އަލީ ޝުޖާއު ވިދާޅުވެއްޖެއެވެ.
ފުލުހުންގެ 92 ވަނަ އަހަރީ ދުވަހުގެ ޖަލްސާގައި ރޭ ވާހަކަދައްކަމުން ސީޕީ ވިދާޅުވީ ދުނިޔޭގެ ކުރިއަރާފައިވާ ގައުމުތަކުގައި ގާއިމުވެފައިވާ ފަދަ ފުލުހުންގެ ހިދުމަތަކަށް ދިވެހި ފުލުހުންގެ ހިދުމަތް ހެދޭތޯ މަސައްކަތް ކުރަމުންދާ ކަމަށާއި އެގޮތުން އެކަމަށްޓަކާ ޒަމާނީ ތައުލީމާއި ޓެކްނޮލޮޖީގެ ބޭނުން ކުރަމުންދާ ކަމަށެވެ.
“ދިވެހި ފުލުހުންގެ ހިދުމަތަކީ ރައްޔިތުންނަށް އަނިޔާވެރި ވާނެ ހިދުމަތެއް ނޫން. ދިވެހި ފުލުހުންނަކީ އަނިޔާވެރި ވާނެ ބައެއް ނޫން،” ސީޕީ ވިދާޅުވިއެވެ.
ސީޕީ ވިދާޅުވީ ވަކިވަކި ފުލުހުންގެ ފަރާތުން ވަރަށް މަދު ހާލަތްތަކެއްގައި ފެންނަ ކަންކަމަކީ މުޅި ހިދުމަތް ރަމްޒުކޮށްދޭ ކަމަކަށް ނުހެދުމަށް އެދޭ ކަމަށެވެ. ރައްޔިތުންނަށް ހިދުމަތް ކުރުން ނޫން އެހެން މަގުސަދެއް ފުލުހުންގެ މުއައްސަސާގައި ނޯންނާނެ ކަމަށާއި ރައްޔިތުންނަށް އަމާންކަން ފޯރުކޮށްދިނުމަށް 24 ގަޑިއިރު ފުލުހުން ދާނީ މަސައްކަތް ކުރަމުން ކަމަށް ސީޕީ ވިދާޅުވިއެވެ.
“ރައްޔިތުންގެ ސަލާމަތާއި ރައްކާތެރިކަން ގާއިމުކުރުމަށް ވާންޖެހުނު ކޮންމެ ގުރުބާނީއެއް ދިވެހި ފުލުހުން ވާނެކަން ދިވެހި ރައްޔިތުން އަދި މި ގައުމު ހެކިވާނެ،” ސީޕީ ވިދާޅުވިއެވެ.
ފުލުހުންނަށް ހުށަހެޅޭ މައްސަލަތައް މިހާރަށް ވުރެ އަވަހަށް ނިންމަން މަސައްކަތް ކުރަންޖެހޭ ކަމަށާއި މައްސަލަތަކުގެ ވާނުވާ މައްސަލަތައް ހުށަހަޅާ ފަރާތްތަކަށް މިހާރަށް ވުރެ ހަރުދަނާކޮށް އަންގަންޖެހޭ ކަމަށްވެސް ސީޕީ ވިދާޅުވިއެވެ.
