ފުވައްމުލަކު ސިޓީގައި ކޮންސްޓްރަކްޝަން މަސައްކަތެއް ކުރަމުންދިޔަ ސައިޓެއްގައި ޒުވާނަކު ނިޔާވެއްޖެއެވެ.
ފުލުހުން ބުނީ ފުވައްމުލައް ހޮސްޕިޓަލްއަށް ގެންދިޔަ މީހަކު އެ ހޮސްޕިޓަލްއަށް ގެންދިޔައިރުވެސް ނިޔާވެފައިވާ މައްސަލަ މިއަދު މެންދުރު 12:11 ހާއިރު އެ އިދާރާއަށް ރިޕޯޓުކޮށްފައިވާކަމަށެވެ.
ފުލުހުން ބުނިގޮތުގައި ނިޔާވެފައިވަނީ އަލިފުށީ، އަބަދަށްހިޔާގެ، އަބްދުﷲ ރިޝްދާން (27 އަހަރު) އެވެ.
އެ އިދާރާއިން ބުނީ މިހާތަނަށް ބެލި ބެލުމުން އެމީހާ ހޮސްޕިޓަލަށް ގެންގޮސްފައިވަނީ ކޮންސްޓްރަކްޝަން މަސައްކަތްކުރާ ސައިޓެއްގައި މަސައްކަތް ކުރަން ހުއްޓާ ޚަބަރު ހުސްވެގެން ވެއްޓިގެންކަމަށެވެ.
އަދި އެމީހާގެ މޫނު މައްޗަށް އަނިޔާވެފައިވާކަން ފާހަގަކުރެވޭކަމަށާއި އެހެންކަމުން މި މައްސަލަ އިތުރަށް ތަހުގީގުކުރަމުން ގެންދާކަމަށްވެސް ފުލުހުން ބުންޏެވެ.
