އެންޓި ކޮރަޕްޝަން ކޮމިޝަން (އޭސީސީ)ގެ ރައީސް އާދަމް ޝާމިލް ދޮގު ހެއްދެވި ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރުގެ ފަރާތުން ހުށަހެޅި މައްސަލަ ނުބަލަން ފުލުހުން ނިންމައިފިއެވެ.
ފުލުހުން މިއަދު އަޒްމިރަލްދާގެ ވަކީލުންނަށް އަންގާފައި ވަނީ އަޒްމިރަލްދާ ހުށަހެޅި މައްސަލަތަކުގައި ޖިނާއީ ކުށުގެ އަމަލެއް ހިންގާފައިވާ ކަމަށް ބަލަން ޖެހޭ އެކަށީގެންވާ ސަބަބެއް ނެތް ކަމަށެވެ.
އަޒްމިރަލްދާގެ ވަކީލު އިބްރާހިމް ޝަމީލް މީޑިއާތަކަށް ފޮނުއްވި ނޫސްބަޔާނެއްގައި ވިދާޅުވީ ފަނޑިޔާރުގެ މައްޗަށް ޖިނާއީ ތަހުގީގެއް ކުރަމުންދާ ކަމަށްބުނެ އޭސީސީގެ ރައީސް ޝާމިލް، ޖުޑީޝަލް ސާވިސް ކޮމިޝަން (ޖޭއެސްސީ)އަށް ސިޓީއެއް ފޮނުއްވައި ދޮގު މައުލޫމާތު ދެއްވާފައިވާ ކަމަށް ތުހުމަތުކުރެވޭ ކަމަށެވެ.
ޖޭއެސްސީން ސުޕްރީމް ކޯޓުގެ ފަނޑިޔާރު އަޒްމިރަލްދާ އާއި މަހާޒް އަލީ ޒާހިރުގެ އިތުރުން ހުސްނުއްސުއޫދުގެ މައްސަލަ މިދިޔަ ފެބްރުއަރީ މަހު ބަލަން ފަށައި، އެ ތިން ފަނޑިޔާރުން ސަސްޕެންޑުކޮށްފައެވެ. ނަމަވެސް ސަސްޕެންޝަނުގައި ހުންނަވަނިކޮށް، ސުއޫދު ވަނީ ފަނޑިޔާރުކަމުގެ މަގާމުން އިސްތިއުފާދެއްވައިފައެވެ.
ޖޭއެސްސީން އަޒްމިރަލްދާ އާއި މަހާޒް އަދި ސުއޫދު ސަސްޕެންޑުކޮށްފައިވަނީ އޭސީސީން ބަލަމުންދާ މައްސަލައަކާ ގުޅިގެން ކަމަށް ބުނެއެވެ. ޖޭއެސްސީން ތިން ފަނޑީޔާރުންގެ މައްސަލަ ބަލަން ފަށާފައިވަނީ އޭގެ ފަހުންނެވެ.
އޭސީސީގެ ރައީސް ޝާމިލް، މަގާމުގެ ނަހަމަ ނުފޫޒު ބޭނުންކުރި މައްސަލައެއް ވެސް އަޒްމިރަލްދާގެ ފަރާތުން ވަނީ މިދިޔަ މަހުގެ 11 ވަނަ ދުވަހު އޭސީސީއަށް ހުށަހަޅައިފައެވެ. އެ މައްސަލަ އޭސީސީން ބަލައިގަތް ނަމަވެސް، އެ މައްސަލަ ކުރިއަށްދާ ގޮތުގެ އިތުރު ތަފްސީލެއް އެ ކޮމިޝަނުން ދީފައެއް ނުވެއެވެ.
