އއ. ރަސްދޫގެ ގެއެއްގެ ކޮޓަރިއެއްގައި ހިނގި އަލިފާނުގެ ހާދިސާގައި ފިހުނު ފިރިހެން މީހާ، އިތުރު ފަރުވާއަށް އިންޑިއާއަށް ގެންގޮސްފިއެވެ.
މިދިޔަ މަހުގެ 24 ވަނަ ދުވަހުގެ ރޭ 11:15 ހާއިރު ރަސްދޫގެ ގެއެއްގައި ހިނގި އަލިފާނުގެ ހާދިސާއެއްގައި ފިހިފައިވަނީ ކުރިން ކައިވެނީގެ ގޮތުން ގުޅިގެން އުޅުނު ދެ މީހަކަށެވެ.
އެ އަލިފާނުގެ ހާދިސާގައި އެންމެ ބޮޑަށް އަނިޔާވެފައިވަނީ އަންހެން މީހާއަށެވެ. އޭނާއަށް އައިޖީއެމްއެޗުގައި ފަރުވާ ދެމުން ދަނިކޮށް މިދިޔަ މަހުގެ 31 ވަނަ ދުވަހު ވަނީ މަރުވެފައެވެ.
ފިރިހެން މީހާގެ ހާލު ވެސް ސީރިއަސް ވެފައިވާ އިރު، އޭނާއަށް ފަރުވާދެމުންދިޔައީ ވެންޓިލޭޓަރުގައެވެ. ނަމަވެސް ފަހުން ވެންޓިލޭޓަރުން ނަގައި އައިސީޔޫގައި ފަރުވާދޭން ވަނީ ފަށައިފައެވެ. އަދި މިހާރު އޭނާ ވަނީ އިންޑިއާއަށް ގެންގޮސްފައެވެ.
އައިޖީއެމްއެޗުން ބުނީ އިތުރު ފަރުވާއަށް އޭނާ އިއްޔެ ރާއްޖެއިން ބޭރަށް ގެންގޮސްފައިވާ ކަމަށެވެ. ނަމަވެސް އެކަމުގެ އިތުރު ތަފްސީލެއް ދީފައެއް ނުވެއެވެ.
