ދެކުނު އޭޝިޔާގެ ފުޓްބޯޅަ ޖަމްޢިއްޔާ (ސާފް)ގެ ޖެނެރަލް ސެކްރެޓަރީގެ މަޤާމަށް ނޭޕާލްގެ ޕުރުޝޮޓަމް ކަޓޭލް ޢައްޔަންކުރެވިއްޖެއެވެ.

ކަޓޭލްއަކީ 17 އަހަރުގެ މުއްދަތަކަށް އޭޝިޔާގެ ފުޓްބޯޅައިގެ މައި ޖަމްޢިއްޔާ ކަމުގައިވާ އޭޝިއަން ފުޓްބޯޅަ ކޮންފެޑެރޭޝަން (އޭއެފްސީ)ގައި މަސައްކަތްކުރައްވާފައިވާ ތަޖުރިބާކާރެކެވެ. އޭނާގެ ޚާއްޞަ ދާއިރާއަކީ ހިންގުމުގެ ދާއިރާއެވެ. ސާފްގެ ޖެނެރަލް ސެކްރެޓަރީގެ މަޤާމަށް އޭނާ ޢައްޔަންކުރެވުނީ ސްރީލަންކާގައި ބޭއްވުނު ސާފްގެ އެކްސްޓްރާ އޯޑިނަރީ ކޮންގްރެސްގައެވެ. މިއީ 2015 ވަނަ އަހަރުން ފެށިގެން ޖެނެރަލް ސެކްރެޓަރީގެ މަޤާމު ފުރުއްވަމުން ގެންދެވި އަންވަރުވަރުން ހައްގު އިސްތިޢުފާ ދެއްވުމާ ގުޅިގެންނެވެ.

ކަޓޭލް ވިދާޅުވެފައިވަނީ ސާފްގެ ޖެނެރަލް ސެކްރެޓަރީގެ މަޤާމު ލިބުމަކީ އޭނާގެ ކެރިއަރުގައި ލިބުނު ވަރަށް ބޮޑު ކުރިއެރުމެއް ކަމުގައެވެ.

“ސާފްގެ ޖެނެރަލް ސެކްރެޓަރީގެ މަޤާމު ލިބުމުން އަޅުގަނޑު ވަރަށް އުފާވެއްޖެ. މިއީ އަޅުގަނޑުގެ ކެރިއަރުގައި ލިބުނު ވަރަށް ބޮޑު ފުރުޞަތަކާއި އެހާމެ ބޮޑު ގޮންޖެހުމެކެވެ. އަޅުގަނޑުގެ ފުޓްބޯޅަ ކެރިއަރު ފެށުނީއްސުރެ މިހާތަނަށް ދެކުނު އޭޝިޔާއާ ވަރަށް ގާތުން މަސައްކަތްކުރަމުން އައީމެވެ. މިއީ ވަރަށް ގޮންޖެހުންތައް ގިނަ ސަރަޙައްދެކެވެ. އެހެންނަމަވެސް މިއީ ކުރިއަރަމުން އަންނަ އަދި ފުރުޞަތުތައް ގިނަ ސަރަޙައްދެއްވެސް މެއެވެ. މި ސަރަޙައްދުގެ ފުޓްބޯޅައިގެ ކުރިމަގު އޮތީ އުޖާލާކޮށްކަން އަޅުގަނޑަށް ޔަޤީންކަން އެބައޮތެވެ،” ކަޓޭލް ވިދާޅުވިއެވެ.

އޭނާ ވަނީ ސާފްގެ ރައީސް، ބަންގްލަދޭޝްގެ ޢާޒީ ސަލާޙުއްދީނަށް ޝުކުރު އަދާކުރައްވާފައެވެ.

“މި މަޤާމަށް އަޅުގަނޑު ޢައްޔަންކުރެއްވީތީ ރައީސް ސަލާޙުއްދީނާއި ހިންގާ ކޮމިޓީގެ މެންބަރުންނަށް ޝުކުރު އަދާކުރަމެވެ. އަދި ހަމައެހެންމެ، އަންވަރުން ހައްގު މިހާތަނަށް ކޮށްދެއްވާފައިވާ މަސައްކަތަށްވެސް ޝުކުރު އަދާކުރަމެވެ،” ކަޓޭލް ވިދާޅުވިއެވެ.

ޖެނެރަލް ސެކްރެޓަރީގެ މަޤާމުގައި ކަޓޭލްގެ އެންމެ ފުރަތަމަ ބޮޑު މަސްއޫލިއްޔަތަކަށް އޮންނާނީ ސްރީލަންކާގައި މި އަހަރުގެ ޖޫން މަހު ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕް ފުޓްބޯޅަ މުބާރާތް ރާވައި ހިންގުމެވެ.