އއ. ރަސްދޫގައި ހިނގި އަލިފާނުގެ ހާދިސާގައި ފިހުނު އަންހެން މީހާ ނިޔާވެއްޖެއެވެ.

މިދިޔަ ހޯމަ ދުވަހުގެ ރޭ އއ. ރަސްދޫގެ ގެއެއްގައި ހިނގި އަލިފާނުގެ ހާދިސާގައި ދެމަފިރިއަކު ވަނީ ފިހިފައެވެ.

އެނގިފައިވާގޮތުގައި އައިޖީއެމްއެޗްގައި ފަރުވާދެމުން ދަނިކޮށް، އޭގެ ތެރެއިން އަންހެން މީހާ ނިޔާވެފައިވަނީ މިއަދުގެ ވަގުތެއްގައެވެ.

ފުލުހުން “ވަން” އަށް މިދިޔަ އަންގާރަ ދުވަހު ބުނެފައިވަނީ މިދިޔަ ހޯމަ ދުވަހުގެ ރޭ 11:15 ހާއިރު ރަސްދޫގެ ގެއެއްގައި އަލިފާން ރޯވި މައްސަލައެއް ފުލުހުންނަށް ރިޕޯޓުކޮށްފައިވާ ކަމަށާއި އެ ހާދިސާގައި އެ ގޭގައި ދިރިއުޅޭ ދެ މީހަކު ޒަހަމްވެގެން ފަރުވާ ދިނުމަށްޓަކައި މާލެއަށް ގެންގޮސްފައިވާ ކަމަށެވެ.

އެ ދެމަފިރިންނަށް ފަރުވާދިނުމަށް އައިޖީއެމްއެޗްއަށް ގެންދިޔަ އިރުވެސް ހާލު ސީރިއަސްއެވެ. އޭގެ ތެރެއިން އެންމެ ބޮޑަށް ފިހިފައިވަނީ އަންހެން މީހާއެވެ. ޑޮކްޓަރުން ވެސް މީގެ ކުރިން އޭނާއަށް ވަނީ އުންމީދު ކަނޑާލައިފައެވެ.