އިދިކޮޅު އެމްޑީޕީން ކުރިޔަށް ގެންދިޔަ އިހުތިޖާޖުގައި އެ ޕާޓީގެ ދުވަސްވީ އެކްޓިވިސްޓުން ކަމަށްވާމަރިޔަމް ޒުބައިރު (މަންދީ) އާއި ފާތިމަތު ޝިއުނާ ފުލުހަށް ހާޒިރުވާން އަންގައިފިއެވެ.

އެ ދެ މީހުން ހާޒިރުވާން އަންގައި ފުލުހުން ފޮނުވި ޗިޓުގައިވާ ގޮތުން ދެ މީހުން ހާޒިރުކުރަނީ ސުލްހަވެރިކަމާ އެކު އެއްވެ އުޅުމުގެ ގާނޫނާ ހިލާފަށް އެއްވުމުގެ އުޅުމާއި އުޅަނދުފަހަރަށް ހުރަަސް އެޅުމާއި ފުލުހުންގެ ވާޖިބު އަދާކުރުމަށް ހުރަސްއެޅުމުގެ ތުހުމަތުގައެވެ.

ދެ މީހުން ވެސް ހާޒިރުވާން އަންގާފައިވަނީ ހޯމަ ދުވަހުގެ މެންދުރު 1 ޖަހާއިރަށެވެ. އެ ދެ މީހުންގެ ތެރެއިން މަންދީ އަކީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމްގެ މަންމައެވެ.

މީގެ ކުރިން ވެސް ވަނީ ސިލްސިލާ މުޒާހަރާތަކާ ގުޅިގެން ބައެއް މީހުން ފުލުހަށް ހާޒިރުކޮށްފައެވެ.

އެ މުޒާހަރާތަކާ ގުޅިގެން މިހާތަނަށް ފުލުހަށް ހާޒިރުކޮށްފައިވާ މީހުންގެ ތެރޭގައި އާރްޑީސީގެ ކުރީގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) އާއި މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ އާއި އެމްޑީޕީގެ ގައުމީ މަޖިލީހުގެ މެންބަރު އަހްމަދު ސަލީމް (މާޒް ސަލީމް)ގެ އިތުރުން ޓެކްސީ ޑްރައިވަރު މުހައްމަދު ޝާމިން ހިމެނެއެވެ.