ކައުންޓަރ ނާކޮޓިކްސް އިންޓެލިޖެންސްއަށް ލިބުނު މަޢުލޫމާތަކާ ގުޅިގެން ވިލިމާލޭގައި ކުރިއަށްގެންދެވުނު މަސްތުވާތަކެތީގެ އޮޕަރޭޝަނެއްގައި ތިން ފަރާތެއް ހައްޔަރުކުރެވިފައިވެއެވެ.
މޯލްޑިވްސް ޕޮލިސް ސަރވިސްއިން މަޢުލޫމާތު ދެއްވިގޮތުގައި ޑްރަގް އެންފޯސްމަންޓް އަދި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި މި އޮޕަރޭޝަނުގައި ހައްޔަރުކުރެވިފައިވަނީ:
1. ތ. ގާދިއްފުށި / ކެނެރީގެ، އިބްރާހީމް އިމާދު (30 އަހަރު)
2. މއ. ވިންޑްސްޓަރ 1 / މާލެ، މުޙައްމަދު ސިމްރާޙް (43 އަހަރު)
3. ގދ. ރަތަފަންދޫ / ޒަމާނީއާގެ، ޞަލާޙު ޝިހ ޝިހާބް (45 އަހަރު)
މި މަހުގެ 9 ވަނަ ދުވަހު ހިންގުނު މި އޮޕަރޭޝަނުގައި އިސްވެދެންނެވުނު ފަރާތްތައް ހައްޔަރުކޮށް ބަލައި ފާސްކުރުމުގައި މަސްތުވާތަކެތި ކަމަށް ބެލެވޭ އެޭ އެއްޗެހި ފެނިފައިވެއެވެ. މި ތަކެތީގެ ވަގުތީ ބަރުދަނަކީ 57.78 ގްރާމެވެ. މީގެ އިތުރުން، މަސްތުވާތަކެތީގެ ވިޔަފާރިން ލިބުނު ކަމަށް ޝައްކުކުރެވޭ 241,000 ރުފިޔާއަށްވުރެ ގިނަ ޢަދަދެއްގެ ފައިސާވެސް ފެނިފައިވާކަމަށް ފުލުހުން މަޢުލޫމާތު ދެއްވިއެވެ.
މި މައްސަލައާ ގުޅިގެން ހައްޔަރުކުރެވުނު ފަރާތްތަކުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން މުޙައްމަދު ސިމްރާޙް (43 އަހަރު) އާއި ޞަލާޙު ޝިހާބް (45 އަހަރު) 15 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން އަމުރުކޮށްފައިވެއެވެ. ނަމަވެސް އިބްރާހީމް އިމާދު (30 އަހަރު) ކޯޓުން ވަނީ ދޫކޮށްލާފައެވެ. މި ނިންމުމާ ގުޅިގެން، އެ މައްސަލަ އިސްތިއުނާފުކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފުލުހުން ވަނީ ހުށަހަޅާފައެވެ.
މި މައްސަލައިގެ ތަޙްޤީޤު މިހާރު ދަނީ ކުރިއަށެވެ.
