“ވިޔަފާރި އެހީ” ލޯނަކީ ކުދި އަދި މެދު ފަންތީގެ ވިޔަފާރިތަކަށް ދުވަހުން ދުވަހަށް ދިމާވާ މާލީ ގޮންޖެހުންތަކުން އަރައިގަތުމަށް އެހީތެރިވުމުގެ މަޤްޞަދުގައި އެސްޑީއެފްސީން ތަޢާރަފުކޮށްފައިވާ ޚާއްޞަ ލޯނު ސްކީމެކެވެ.
އެސްޑީއެފްސީން މަޢުލޫމާތު ދެއްވާފައިވާ ގޮތުގައި، މެދުކެނޑުމެއްނެތި ވޭތުވެދިޔަ އެއް އަހަރު ދުވަހު ވިޔަފާރިކުރަމުން އައިސްފައިވާ ހުރިހާ ފަރާތްތަކަށްވެސް މި ލޯނަށް އެދި ހުށަހެޅުމުގެ ފުރުޞަތު ލިބިގެންދާނެއެވެ. މި ލޯނުގެ ދަށުން މުދާ ގަތުމަށާއި ވިޔަފާރީގެ ދުވަހުން ދުވަހަށް ހިނގާ ޚަރަދުތައް ހަމަޖެއްސުމަށް ބޭނުންކުރެވޭނެއެވެ.
“ވިޔަފާރި އެހީ” ލޯނު ސްކީމްގެ ދަށުން އެންމެ ގިނަވެގެން ނެގޭނީ 1.5 މިލިއަން ރުފިޔާއެވެ. ނަމަވެސް، ލޯނުގެ އަދަދު 700,000 ރުފިޔާއަށްވުރެ އިތުރުވާނަމަ ރަހުނެއް ބަހައްޓަން ޖެހޭނެއެވެ. މި ލޯނުގެ އިންޓަރެސްޓް ރޭޓަކީ އަހަރަކު 9.5 އިންސައްތައެވެ.
އިތުރު ތަފްޞީލުތަކުގެ ތެރޭގައި، ގްރޭސް ޕީރިއަޑްގެ ގޮތުގައި ގިނަވެގެން 6 މަސްދުވަސް ދެވޭނެ ކަމަށާއި، ލޯނު އަނބުރާ ދެއްކުމަށް ގިނަވެގެން 5 އަހަރުގެ މުއްދަތެއް ދެވޭނެ ކަމަށް އެސްޑީއެފްސީން ހާމަކޮށްފައިވެއެވެ.
އެސްޑީއެފްސީއަކީ 2019 ވަނަ އަހަރު އުފެއްދި ކުންފުންޏެކެވެ. މި ކުންފުނީގެ މައިގަނޑު މަޤްޞަދަކީ ކުދި އަދި މެދު ފަންތީގެ ވިޔަފާރިތައް އަލަށް ފެށުމަށާއި، ހިނގަމުންދާ ވިޔަފާރިތައް ދެމެހެއްޓެނިވި ގޮތެއްގައި ކުރިއަރުވައި، އިތުރަށް ތަރައްޤީކޮށް ފުޅާކުރުމަށް ބޭނުންވާ މާލީ އެހީތެރިކަން ފޯރުކޮށްދިނުމެވެ.
ކިޔުންތެރިންގެ ހިޔާލު